QARAǴANDY. 1 maýsym. Mamyrdyń sońǵy kúni Qaraǵandydaǵy Spassk memorıaldyq kesheninde saıası qýǵyn-súrgin qurbandaryn eske alý kúnine oraı qaraly mıtıng ótti. Bul týraly egemen.kz tilshisi habarlady.
Jazyqsyz qurbandardyń arýaǵyna taǵzym ete kelgen kópshilik aldynda Qazaqstan halqy Assambleıasy hatshylyǵynyń meńgerýshisi Eraly Toǵjanov, Qaraǵandy oblysynyń ákimi Nurmuhamet Ábdibekov sóz sóıledi.
О́tken ǵasyrdyń 30-shy jyldarynda qazaq saharasynda StepLag, QarLag, ALJIR tárizdi talaı jazyqsyz jannyń túbine jetken abaqtylar júıesi bolǵany málim. Sol lagerlerde Keńes Odaǵynyń túkpir-túkpirinen aıdalǵan 5 mıllıondaı adam azap shekti. Qaraly jıyn ótken Spassk kesheninde sol bir qasiret jyldarynda qaza tapqan jandar jerlengen.
Keshende túrli ult ókilderiniń qurban bolǵan tulǵalaryna arnalǵan jıyrmadan astam eskertkish bar. Osy joly zamanynda Qazaqstanǵa jer aýdarylyp, qýǵyn-súrgin kórgen 107 myńdaı qarashaı-malqar ultynyń ókilderine arnap memorıaldyq belgi ornatyldy.
Qaırat Ábildınov.
Derek, foto: egemen.kz.