Elimiz Parlamenti Májilisiniń Tóraǵasy Baqtyqoja Izmuhambetov Reseı Federasııasynyń Qazaqstandaǵy Tótenshe jáne ókiletti elshisi Mıhaıl Bocharnıkovti qabyldady, dep habarlady Májilistiń baspasóz qyzmeti.
Taraptar eki memleket prezıdentteriniń salıqaly saıasatynyń arqasynda qarqyndy damyp kele jatqan Qazaqstan men Reseı arasyndaǵy strategııalyq áriptestik jaıyna aıryqsha nazar aýdardy.
Májilis Tóraǵasy meımandy jyl saıyn 12 maýsymda atalyp ótetin Reseı kúni merekesimen quttyqtaı kelip, Reseı Federasııasy ár kezde Qazaqstannyń mańyzdy áriptesi ári odaqtasy jáne senimdi dosy bolyp qala beretinin jetkizdi.
О́z kezeginde elshi keshegi ulttyq aza tutý kúnine baılanysty kóńil aıtý bildirdi.
Osy rette Májilis Tóraǵasy Aqtóbede oryn alǵan aıaýsyz, qaskóı lańkestik áreketti aıyptaı kelip: «Bul bizdiń jas memleketimiz úshin ashy sabaq boldy. Qoǵamdyq kelisim, saıası turaqtylyq bizdiń kóp ultty Qazaqstanymyzdyń basty qundylyqtary bolyp tabylady. Elbasymyz, Úkimet, Parlament, basqa da quzyrly organdar aldaǵy ýaqytta mundaı jaǵdaıdyń aldyn alý úshin tıisti sharalardy qolǵa alatyny sózsiz», – dedi.
Odan ári taraptar eki memleket arasyndaǵy halyqaralyq qaýipsizdik, mádenı-gýmanıtarlyq baılanys máselelerin talqylady. Kezdesý ıeleri álemdik ekonomıkalyq daǵdarys eki el arasyndaǵy saýda-ekonomıkalyq qarym-qatynastyń damýyna óz salqynyn tıgizgenin, alaıda, ótken jyldyń qańtar aıynan iske kirisken EAEO bizdiń elderimizdiń ulttyq ekonomıkasyn turaqtandyrýda aıryqsha ról atqaryp kele jatqanyn atap ótti.
Qazaqstan-Reseı áriptestiginiń barlyq salada jan-jaqty, tabysty damyp kele jatqanyn alǵa tartqan M. Bocharnıkov 2017 jyly eki el arasynda dıplomatııalyq qarym-qatynastyń ornaǵanyna 25 jyl tolatynyn eske saldy.
B.Izmuhambetov pen M.Bochar-
nıkov parlamentaralyq yntymaqtastyqty nyǵaıtýdyń mańyzdylyǵyna da nazar aýdardy. Qazirgi ýaqytta Parlament Májilisi men Memlekettik Dýma arasynda ózara is-qımyl ornatylǵan. Palatalar arasynda yntymaqtastyq týraly kelisim bar. Depýtattar TMD Parlamentaralyq Assambleıasy, UQShU, EQYU Parlamenttik Assambleıasy aıasynda jemisti eńbek etýde.
Májilis Spıkeri atap ótkendeı, Reseı Federasııasy Federaldyq Jınalysy Federasııa Keńesiniń Tóraıymy Valentına Matvıenkonyń jýyrdaǵy Qazaqstanǵa sapary parlamentaralyq yntymaqtastyqty damytýǵa ózindik serpin bergen.