Májilis Spıkeri Baqtyqoja Izmuhambetovtiń tóraǵalyǵymen Májilis bıýrosy ótti, dep habarlady osy palatanyń baspasóz qyzmeti.
Onda aldaǵy jalpy otyrystyń kún tártibi qaralyp, depýtattar nazaryna 1998 jylǵy 6 shildedegi Qazaqstan men Reseı arasyndaǵy Jer qoınaýyn paıdalanýǵa arnalǵan egemendik quqyqtardy júzege asyrý maqsatynda Kaspıı teńizi soltústik bóliginiń túbin mejeleý týraly kelisimge Hattamaǵa ózgeris engizý týraly Hattamany ratıfıkasııalaý týraly zań jobasy usynylmaq.
Hattama eki memlekettiń atynan ýákiletti uıymdar arqyly Kaspıı teńiziniń soltústik bóliginiń túbindegi kendi Qazaqstanda «Qurmanǵazy» («Qulaly»), Reseıde «Sentralnaıa» jáne «Hvalynskoe» ken oryndary qurylymdarynda birlesip ıgerýge quqyqtyq negizderdi belgileıdi.
Aldaǵy jalpy otyrysta Májilis ósimdikter men janýarlar dúnıesi máseleleri boıynsha, sondaı-aq, áýe keńistigin paıdalaný jáne avıasııa qyzmetine qatysty túzetýlerge arnalǵan zań jobalaryn jumysqa qabyldaıdy dep kútilýde.
Sonymen qatar, osy kúni Halyqaralyq ǵylymı-tehnıkalyq ortalyqtyń qyzmetin jalǵastyrý týraly kelisimdi jáne 1994 jylǵy 15 sáýirdegi Uly Otan soǵysynyń qatysýshylary men múgedekterine, basqa memleketterdiń aýmaǵyndaǵy urys qımyldaryna qatysýshylarǵa, qaza tapqan áskerı qyzmetshilerdiń otbasylaryna arnalǵan jeńildikter men kepildikterdi ózara taný týraly kelisimge ózgerister men tolyqtyrýlar engizý týraly hattamany ratıfıkasııalaýǵa baılanysty beıindi komıtetterge qorytyndy ázirleý merzimi taǵaıyndalatyn bolady.