Derek pen dáıek
Atyraýda zańdastyrylǵan múlik baǵasy osynsha somany qurady
Uıqynyń tynysh, kóńildiń jaıly bolýyn qalaısyz ba? Buǵan memleket múmkindik berip otyr. Tapqan tabysyńdy, keń saraıdaı baspanańnyń baryn jasyrmaı, jappaı zańdastyrý sharasynyń túpki maqsaty – osy. Muny munaıly óńirdi meken etken turǵyndar jete túsine bastaǵanyna tómendegi derekter kýá bola alady. Múlikti jarııa etý sharasy bastalǵaly beri turǵyndardan qoldaǵysyn zańdastyrý maqsatyndaǵy 1343 ótinish túsipti. Dál keshegi kúnge deıin osy ótinishterdi egjeı-tegjeıli pysyqtaǵan arnaıy komıssııanyń sheshimimen 11,4 mıllıard teńgeniń múligi jarııa etilip otyr.
Turǵyndar tarapynan qoldaǵy dúnıesinen bólek, mańdaı terimen tapqan qarjysyn da zańdastyrýǵa talpynys baıqalady. Atyraý oblystyq memlekettik kirister departamentiniń baspasóz qyzmeti usynǵan málimetke súıensek, munaıly óńir jurtshylyǵy 7,9 mıllıard teńge qarjysyn zańdastyryp alypty. Árıne, qazir kásibinen násip tapqandardyń shetelderdiń kez kelgeninen baspana alýyna esh tosqaýyl joq. Osy turǵydan alǵanda, atyraýlyqtar sheteldegi múlikke qatysty 18 ótinish bergen eken. Bular da komıssııa músheleriniń otyrysynda qaralyp, nátıjesinde jalpy quny 207,4 mıllıon teńgege baǵalanǵan shetelderdegi múlikterdi jarııa etýge sheshim qabyldanypty.
Demek, aldaǵy ýaqytta múlikti jarııa etýge qulshynys ta, ony zańdastyrýǵa baılanysty oń sheshim de molaıa túsetin sekildi.
Joldasbek ShО́PEǴUL,
«Egemen Qazaqstan»
ATYRAÝ