AQSh-tyń Pensılvanııa shtatyndaǵy Fıladelfııa qalasy kósheleriniń birinde reportaj júrgizip turǵan Amerıkanyń ıspan tildi «Telemýndo-62» telearnasynyń jýrnalıst qyzy týra tikeleı efır habary barysynda soqqyǵa jyǵyldy.
Fox News telearnasy atap kórsetkendeı, Irıs Delgado quramynda qanty kóp salqyndatylǵan sýsyndarǵa salynatyn salyqtarǵa arnalǵan reportaj júrgizip turǵan. Jergilikti bir áıel sol kezde qaıta-qaıta jýrnalıstiń nazaryn ózine aýdarmaqshy bolady. Alaıda, tilshiniń ózine kóńil bólmegenine kózi jetip, buǵan ashý bildirgen ol qolyn qulashtap turyp silteıdi. Sol sátte áıeldiń judyryǵy jýrnalıstiń betine sart etip tıgenin telearna kórermenderiniń bári kórdi.
Túsirý toby sol boıda buzaqy áıeldiń aldyna tura qalyp, onyń budan ári shabýyl jasaýyna jol bermeıdi. Artynsha polısııa kelip, áıeldi alyp ketedi. Keıin belgili bolǵandaı, ol jurtpen shaıqasyp, shabýyl jasaıtyn minez-qulqymen, qorshaǵan ortaǵa zııanyn tıgizip júretin tirligimen burynnan jergilikti polısııanyń esebinde turady eken.
«Telemýndo-62» telearnasynyń aqparynsha, Irıs Delgado ózi sebepker bolmaǵan urystyń birinshi ret qurbanyna aınalyp otyr. Qazir onyń jaǵdaıy jaqsy, biraq bastan keshken oqıǵasyna qaraı tartqan jan azabynan arylyp, óz-ózine kelýi úshin áli biraz ýaqyt kerek.
Talǵat Raıymbek.
Derek, foto: Fox News.