Keshe Ortalyq kommýnıkasııalar qyzmetinde «Astana EKSPO-2017» ulttyq kompanııasy» AQ basqarma tóraǵasynyń orynbasary Erbol Shormanov baspasóz máslıhatyn ótkizdi. Onda osy maýsym aıynyń 10-ynan
bastap kórmege kirý bıletteri satyla bastaǵany jóninde aıtyldy.
Búginde qurylys jumystary qarqyndy júrip jatqanyna toqtalǵan basqarma tóraǵasynyń orynbasary, EKSPO-2017 halyqaralyq kórmesine qatysatyn elder osy jyldyń sońyna qaraı kórme aýmaǵyndaǵy pavılondaryna ónimderin toltyra bastaıtynyn jetkizdi. «EKSPO kórmesi – táýelsiz Qazaqstannyń tarıhyndaǵy eń iri joba bolǵandyqtan, jaýapkershiligi joǵary. Bul jobany abyroımen júzege asyrǵymyz keledi. Qazir kórmeniń daıyndyǵy qarqyndy júrip jatyr. Qurylys jumystary da kestege saı oryndalyp keledi. Sondyqtan, osy jyldyń sońynda halyqaralyq kórmege qatysýyn rastaǵan memleketterdiń pavılonyn ózderine tapsyramyz. Ol elder osy jyldyń sońynan bastap pavılondaryn toltyra bastaıdy», dedi E.Shormanov.
Qazirgi kúnge deıin 90 el men 15 halyqaralyq iri uıym Astanadaǵy kórmege qatysatynyn rastapty. Sondaı-aq, 70 eldiń komıssarlary anyqtalyp, 50 kelisimshartqa qol qoıylypty. Al endi sharanyń negizgi maqsatyna kósher bolsaq, 10 maýsym kúni, ıaǵnı kórmeniń ashylýyna týra bir jyl qalǵanda bıletter satylymǵa tústi. Kórmeniń resmı saıtyna kirip, elektrondy bılet te satyp alýǵa bolady. Osy jyldyń 10-20 maýsym aralyǵyndaǵy promo kezeńde EKSPO-2017 halyqaralyq kórmesiniń eń arzan bıleti 2 000 teńge bolady. Iаǵnı, proma kezeńde bılet quny 50 paıyzǵa deıin arzandaǵan. Arnaıy kúnderdiń eń arzan bıleti 12 myń teńge bolady. Sondaı-aq, ulttyq merekeler qarsańynda da kórme bıletteri «kóshpeli» saýdaǵa túsedi eken.
Áıtse de, qazir satyp alǵan bıletti keıin naqty datasy bar bıletke aýystyrý kerek. Iаǵnı, 2017 jyldyń 1 aqpanynan bastap kórmeniń resmı saıtyndaǵy jeke kabınetińizden, bolmasa, resmı saıttan bılet aýystyryp alýǵa bolady. Al 2016 jyldyń 1 qyrkúıeginen bastap elimizdiń túkpir-túkpirinde EKSPO kórmesiniń bıletterin satatyn oflaın-kassalar ashylady. Bir adam 50 bıletten artyq ala almaıtyn talap bar. «Biz satylymdy birneshe kezeńge bóldik. Birinshi promo kezeń 10 maýsymnan 10 shildege deıingi ýaqytty qamtıdy. Sondaı-aq, 2017 jyldyń 9 maýsymyna deıin aldyn ala satylym ótedi. Al kórme bastalǵan kezde, ıaǵnı 2017 jyldyń 10 maýsymynan bastap basqa baǵa belgilenip otyr. Qazirgi ýaqytty promo kezeń dep atadyq. Osy kezeńde bıletter arzan baǵamen satylady. Bıletterdi 10 maýsymnan 20 maýsymǵa deıin 50 paıyzdyq jeńildikpen alasyzdar», dedi bul jóninde «Astana EKSPO-2017» UK» AQ Qoǵammen baılanys departamentiniń bas menedjeri Aqsulý Arzyqulova.
Buǵan qosa, bıletterdiń birneshe túri bar. Olar ashyq dataly. Iаǵnı, kúni belgilenbegen jáne kúni belgilengen, sonymen qatar, jumys kúnderi jáne demalys kúnderine arnalǵan bıletter bolyp bólinedi eken. Olar eki túrli baǵamen usynylyp otyr. Sondaı-aq, kórmege bıletterdi satý da birneshe kezeńge bólinipti. Bularmen birge, belgili kezde bıletterdiń quny ósedi eken. «2017 jyldyń maýsymynan bastap baǵa 30-35 paıyzǵa ósedi. Mysaly, kúni belgilengen bılet jumys kúnderi 2 myń teńgeden, demalys kúnderi 3 myń teńgeden, al kúni belgilenbegen bıletter jumys kúnderi 3 myń teńgeden, demalys kúnderi 4 myń teńgeden satylady. Sondaı-aq, arnaıy kúnder qarastyrylǵan. Kórmeniń ashylý (10 maýsym) jáne jabylý (10 qyrkúıek) saltanaty kúni, 6 – shilde Astana kúni, 30 tamyz – Konstıtýsııa kúninde bılet quny áldeqaıda joǵary bolady», dedi bas menedjer.
Taǵy bir belgili bolǵany 2017 jylǵy maýsymnyń 10-y men qyrkúıektiń 10-y aralyǵynda ótetin EKSPO halyqaralyq kórmesine 100 el, 10-nan astam halyqaralyq uıym, ınnovasııalyq tehnologııalar salasyndaǵy 10 ozyq kompanııa qatysady degen úmit bar eken. Jalpy alǵanda, kórme shamamen 5 mıllıon ret tamashalanyp, eki mıllıonnan astam adam keledi eken. Sondyqtan, aýqymdy sharany ótkizýdiń qaýipsizdik sharalary da pysyqtalyp jatqan kórinedi.
Maýsymnyń 10-y kúni www.tickets.expo2017astana.com saıtynda EKSPO-2017 kórmesiniń bıletterin on-laın rejimde satý bastalǵany belgili. Konkýrstyq komıssııanyń sheshimimen reseılik «Kassir.com» kompanııasy bılet satýshy resmı operator retinde belgilendi. Shara barysynda áleýmettik jelide keńinen talqylanyp jatqan osy máselege qatysty da túsinikteme berildi. «Astana EKSPO-2017» ulttyq kompanııasy osy ýaqytqa deıin bılet satatyn qazaqstandyq kompanııany quryp, bılet satý jumysyna daıyndaýǵa bolatyn edi. Alaıda, Halyqaralyq kórmeler bıýrosy tıisti talaptardy qoıyp otyr. Osyny umytpaý qajet. Sol talaptarǵa sáıkes, bılet satatyn kompanııanyń halyqaralyq jobalardy iske asyrý tájirıbesi bolýy shart. О́kinishke qaraı, bizde ondaı kompanııa joq bolyp shyqty. Al aqsha eshqaıda ketpeıdi. Sebebi, Qazaqstanda atalǵan kompanııanyń fılıaly jumys isteıdi», dedi E.Shormanov.
Nurbaı ELMURATOV,
«Egemen Qazaqstan»