[caption id="attachment_48787" align="aligncenter" width="560"] ras.kz[/caption]
Altaı ólkesindegi Barnaýl qalasynyń turǵyny Dmıtrıı Mameev aqshasy joqtyqtan Vladıvostok qalasyna jaıaý bara jatyr. ras.kz habaryna qaraǵanda, ol Prımore ólkesine jumys izdep bara jatqan kórinedi. Sol úshin Irkýtskide poıyzǵa otyryp, Amýr oblysyna deıin jetken. Biraq sol jerde aqshasy taýsylypty. Sonda da betinen qaıtpaǵan 24 jasar jigit ary qaraı Baıkal arqyly Prımore ólkesine deıin jaıaý barýǵa sheshim qabyldaǵan.
«Amýrskaıa pravda» gazetiniń jýrnalısteri anyqtaǵandaı, jas jigit budan buryn Prımore ólkesinde áskerı-teńiz flotynda qyzmet etken eken. Endi ol sol jaqtan kommersııalyq kemeden nemese kontrakt boıynsha teńizshilik qyzmetin taýyp almaqshy.
«Úıde meniń problemam kóp boldy, jumys joq, sondyqtan Vladıvostokqa barmaqshy bolyp sheshtim. Aqsham Irkýtskige deıin ǵana jetti, endi qalǵan joldy jaıaý júrip ótemin. Jolda óte sırek aıaldaımyn. Mundaǵy tabıǵat qyzyq – masa talap qoıatyn emes! Tipti kúndiz, kún shyǵyp turǵanda da», – dep jazady Dmıtrıı.
Amýr jýrnalısteri barnaýldyq jigitten jolaı kezdesken jergilikti turǵyndardyń kómektes-kómektespegenderin surapty. Dmıtrıı buǵan «qaıyrymdy adamdar bar, kóp emes: Belgorod aýdanynda bir qyz tamaq jınap berdi, kıimmen jabdyqtady», dep jaýap bergen. Aıtqandaı, bul boıjetken Dmıtrıı Mameevtiń jaıaý sapar shegip kele jatqanyn áleýmettik jeliden bilipti.
Ol týraly Býrıatııa turǵyndary bylaı dep jazǵan: «Biz qoldan kelgeninshe kómektestik. Másele mynada, jolda eshkim toqtamaıdy, dalneboıshıkter almaıdy. Sondyqtan joldaǵylardan ony ala ketýdi nemese toıyndyryp jiberýdi ótinemiz. Onyń aty – Dıma. Ol tym qarapaıym. Bárińizge de rahmet, trassada júrgender – kómektesińizder!»
Saıahatshy alda áli Evreı oblysy, Habarov jáne Prımore ólkeleri terrıtorııalarymen 1000 shaqyrym jerdi júrip ótýi kerek.
Talǵat RAIYMBEK.