L.N.Gýmılev atyndaǵy Eýrazııa ulttyq ýnıversıtetinde jańa Konstıtýsııa jobasyn talqylaýǵa arnalǵan dóńgelek ústel ótti. Basqosýda «Ádiletti Qazaqstan», «Taza Qazaqstan», «Adal azamat», «Zań men tártip» uǵymdarynyń Ata zańdaǵy kórinisi jan-jaqty qaraldy. Is-sharany Jýrnalıstıka jáne áleýmettik ǵylymdar joǵary mektebi uıymdastyrdy.
Otyrysqa ǵalymdar, sarapshylar men akademııalyq qoǵamdastyq ókilderi qatysty. Senat depýtaty Darhan Qydyráli dóńgelek ústelde sóz sóılep, Negizgi zańnyń jańa redaksııasy qoǵamnyń zamanaýı suranystaryn qamtıtynyn, adam men tutastaı elimizdiń damýyna baǵdarlanǵanyn atap ótti.
«2017 jylǵy 15 aqpanda sol kezdegi Senat tóraǵasy Qasym-Jomart Toqaev óziniń resmı Twitter paraqshasynda «Qazirgi «Máńgilik el», «Uly dala» uǵymdaryn Konstıtýsııaǵa engizý qajet» degen jazba jarııalady. Sodan kelesi kúni «Egemen Qazaqstan» gazetine bul oıdy arnaıy baǵanǵa materıal retinde ázirlep, el nazaryna usyndyq. Búginde jańa Ata zań jobasynda osy uǵymdardyń kórinis tabýy 2017 jylǵy usynystyń praktıkalyq iske asýynyń dáleli desek, boldy. Sondaı-aq erekshe atap óterligi – árbir qoǵamdy biriktiretin ortaq armandar men múddelerdiń Konstıtýsııaǵa engeni. Mysaly, elimizde bolashaqta tehnologııalyq ınnovasııalarǵa saı qalalar salynyp jatsa, muny da halyqtyń ortaq armanynyń júzege asqan kórinisi retinde qarastyrýǵa bolady. Demek jańa Konstıtýsııa – fılosofııalyq ári tarıhı máni tereń, qoǵamnyń rýhanı, praktıkalyq qajettiligin qamtıtyn, bolashaqqa baǵyttalǵan mańyzdy qujat», dedi senator.
Eske salsaq, jańa Konstıtýsııa jobasynda adamǵa jáne adam kapıtalyn damytýǵa erekshe nazar aýdarylǵan. Negizgi zańda sóz, oı bostandyǵy, ozyq oıly ultty qalyptastyrý, bilim men ǵylymdy damytý, sondaı-aq tól biregeılikti nyǵaıtý sekildi negizgi qundylyqtar kórinis tapty.
«Ýaqyt bir orynda turmaıdy. Keıingi jyldary qoǵam da, bizdi qorshaǵan álem de aýqymdy ózgerister kezeńin bastan ótkerip jatyr. Qoǵamdyq qatynastardyń jańǵyrýy, saıası júıeniń transformasııasy, áleýmettik qurylymnyń damýy – munyń barlyǵy quqyqtyq negizderdi jetildirýdi talap etedi. Osy turǵydan alǵanda, Konstıtýsııa jobasyndaǵy jańashyldyqtar eldiń odan ári ornyqty damýyn qamtamasyz etýge, memlekettik ınstıtýttardyń tıimdiligin arttyrýǵa, qoǵamdaǵy kelisim men birlikti nyǵaıtýǵa baǵyttalǵan», dedi L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov.
Jıynda Qazaqstan halqy Assambleıasy etnomedıasııa jónindegi respýblıkalyq keńesiniń tóraǵasy Sherzod Pýlatov memlekettiń egemendigin nyǵaıtý, qoǵamdyq kelisimdi saqtaý, bılik pen qoǵam arasyndaǵy dıalog tetikterin damytý máselelerine erekshe nazar aýdardy.
«Jańa Konstıtýsııa – adamnyń quqyqtary men bostandyqtaryn, azamattardyń bolashaǵyn qamtıtyn mańyzdy qujat. Onyń eń basty róli – qoǵamdyq kelisimdi nyǵaıtý jáne eldiń turaqty damýyna negiz jasaý. Jańa zań jobasy negizinde Qazaqstan halqy keńesi qurylady. Ol Ulttyq quryltaı men Assambleıa jumys isteıtin alańdardy biriktirip, qoǵamdyq múddelerdi bir ortaq platformada damytýǵa múmkindik beredi. Bul – el birligin, tynyshtyǵyn ári bolashaqqa degen senimin arttyratyn mańyzdy qadam. Baıqaǵanymyzdaı, azamattar jańa jobany qoldaıdy. О́ıtkeni jańa Konstıtýsııa arqyly balalarymyzǵa qaýipsizdikti qamtamasyz etetin quqyqtyq negiz jasap otyrmyz», dedi ol.
Kezdesý barysynda sarapshylar osylaı Konstıtýsııa jobasyn keńinen túsindirý, qoǵammen ashyq pikir almasý alańdaryn uıymdastyrý, azamattardyń usynys-pikirlerin eskerý mańyzdy ekenin jetkizdi.