Aldaǵy referendýmǵa bes memleketten 21 sheteldik baıqaýshy qatysýǵa nıet bildirdi. Atap aıtsaq, Ázerbaıjan, Palestına, Qyrǵyz Respýblıkasy, Tájikstan men Taıland koroldiginen keledi. Sondaı-aq TMD baıqaýshylary mıssııasynan, Azııadaǵy ózara is-qımyl jáne senim sharalary keńesinen, Túrki akademııasynan baıqaýshylar bolady. Bul týraly Ortalyq referendým komıssııasynyń ekinshi otyrysynda aıtyldy.
Elimizdegi jalpyhalyqtyq saıası naýqanda múmkindigi shekteýli azamattar erkin ári kedergisiz daýys beredi. Máselen, kórý jáne estý qabileti buzylǵan jandarǵa Braıl qarpindegi trafaretter, aýdıobıýlletender men sýrdoaýdarmaly aqparattyq materıaldar usynylady.
«Barlyq saılaýda múgedektigi bar adamdarǵa erekshe múmkindik jasaýdy nazardan shyǵarmaımyz. Qazirgi tańda trafaretterdi daıyndaý jáne basyp shyǵarý jumystary júrgizilip jatyr. Olar barlyq referendým ýchaskesine jetkiziledi. Sondaı-aq ár ýchaskede bıýlletenderdi toltyrý týraly arnaıy aýdıo nusqaýlyq qarastyrylǵan», dedi Ortalyq referendým komıssııasynyń tóraǵasy Nurlan Ábdirov.
Jıynda Ortalyq referendým komıssııasynyń múshesi Lázzat Súıindik ýchaskeler birinshi qabatta ornalasatynyn aıtty. Sondaı-aq olar múmkindigi shekteýli azamattar úshin pandýstar, kireberistegi shaqyrý batyrmalary, avtokólikterge arnalǵan arnaıy turaq oryndary, taktıldi jolaqtar men arnaıy beıimdelgen kabınalarmen jabdyqtalady. Iаǵnı saılaý ýchaskeleri úlkeıtkish, qulaqqap, tirek-qımyl apparaty buzylǵan azamattardyń qoljetimdiligi eskerilgen daýys berý buryshtarymen qamtamasyz etiledi.
«Barlyq daýys berý ýchaskesinde Konstıtýsııa jobasynyń mátinin aýdıo súıemeldeýmen ornalastyrý múgedektigi bar adamdar úshin qoljetimdilikti qamtamasyz etýge baǵyttalǵan jańa tásil sanalady. Oǵan qosa barlyq deńgeıdegi referendým komıssııalarynyń múshelerine múgedektigi bar azamattardyń saılaý quqyqtaryn qamtamasyz etý máseleleri boıynsha beınekýrs uıymdastyrylǵan. Búginde 85 paıyzy kýrstan ótti. Aqpan aıynyń aıaǵyna qaraı bul kórsetkish 100 paıyzǵa jetkiziledi», dedi L.Súıindik.
Otyrysta 17 oblys pen 3 respýblıkalyq máni bar qalalardaǵy ahýal da tyńdaldy. Máselen, Aqmola oblysynda daýys beretin 2 752 múgedektigi bar azamat anyqtalǵan. Múmkindigi shekteýli azamattardy tasymaldaýǵa oblys ortalyǵynda 5 arnaıy kólik, aýdandar men aýyldyq okrýgterde 11 kólik bólingen.
«737 ýchaske tekserildi. 642 ýchaske pandýstarmen jabdyqtalǵan, 561 ýchaskede baǵyttaýshy jáne taktıldi kórsetkishter ornatylǵan, barlyq ýchaskede kreslo-arbamen qozǵalatyn azamattarǵa qoljetimdi arnaıy kabınalar qarastyrylǵan, 700 ýchaskede múgedektigi bar adamdarǵa arnalǵan arnaıy buryshtar jabdyqtalǵan. Sondaı-aq 85 ýchaskede 16 sýrdoaýdarmashy qyzmet kórsetedi. Daýys berý kúni áleýmettik qyzmetkerlerdi tartý máselesi de tolyq pysyqtalǵan», dedi Aqmola oblysy ákimi apparatynyń basshysy Erjan Jumabekov.
Jalpy referendým respýblıka aýmaǵyndaǵy 10 411 ýchaskede ótkiziledi. Onyń ishinde elimizdiń shet memleketterindegi ókildikteri janynda qurylǵan 62 ýchaske bar. Daýys berý ýaqyty saǵat 7.00-den 20.00-ge deıin júredi.
«Densaýlyq jaǵdaıyna nemese ózge de dáleldi sebepterge baılanysty ýchaskege kele almaıtyn azamattar 15 naýryz kúni saǵat 12.00-ge deıin jazbasha ótinish bere alady. Bul jaǵdaıda ýchaskelik komıssııa keminde eki múshesin jáne tasymaldanatyn jáshikti jiberý arqyly azamattyń turǵan jerinde daýys berýdi uıymdastyrady. Daýys berý qupııasy tolyq saqtalýǵa tıis», dedi Ortalyq referendým komıssııasynyń múshesi Azamat Aımanakýmov.
Aıta keteıik, turaqty tirkelgen jerinen alynyp tastalǵan nemese esh jerde tirkeýde bolmaǵan azamattardyń saılaý quqyqtaryn iske asyrý maqsatynda azamattarǵa daýys berý kúni ýchaske ornalasqan úı-jaıda ýaqytsha tirkelý múmkindigi beriledi.