Osydan birneshe kún buryn Germanııanyń Mınden qalasynda Muhammed esimdi bosqyn qaıyrymdylyq uıymy bergen shkaftan 150 myń eýro kóleminde aqsha taýyp alypty. Oılamaǵan jerden baılyqqa kenelgen ol kóp oılanbastan, jergilikti bılikke qaıtaryp bergen eken.
О́tken jyly ǵana Sırııadan qonys aýdaryp kelgen 25 jastaǵy jigit bul isi arqyly kópshiliktiń ystyq yqylasyna bólenip úlgerdi. Málimetterge qaraǵanda, 50 myń eýro qolma-qol túrinde bolsa, qalǵan 100 myń eýro chek túrinde taqtaıdyń ishinde jasyrylǵan eken. Osydan soń sırııalyq azamat birden tıisti oryndarǵa habar bergen.
– Muhammed kópshilikke úlgi bolarlyqtaı is jasady. Búginde tabylǵan aqshany polısııa qyzmetkerlerine tapsyratyndar joq dep aıtýǵa kelmes. Biraq mundaı qomaqty qarjyny qaıtarǵandy alǵash kórip otyrmyn, – dedi polısııa qyzmetkeriniń biri.
Qazirgi tańda quqyq qorǵaý organdary aqshanyń óz ıesin izdestirýde.
Muhammed Germanııaǵa 2015 jyldyń qazan aıynda kelgen. Búginde ol nemis tilin arnaıy kýrstardan úırenip jatyr. Týǵan elinde ol baılanys tehnologııalary mamandyǵy boıynsha bilim alǵan eken. Aldaǵy ýaqytta osy bilimin jergilikti joǵary oqý oryndarynyń birinde jalǵastyrýdy maqsat etip otyr.
Aıta keteıik, búginde Taıaý Shyǵys elderindegi jaǵdaıdyń qıyndyǵyna baılanysty Eýropaǵa kóship jatqandardyń qatary kún sanap artyp barady. Birikken Ulttar Uıymy bir ǵana Sırııada 4,6 mıllıon adam týǵan elin tastap ketýge májbúr bolǵanyn habarlady. Al, jalpy alǵanda, kóptegen elderdegi bosqyndardyń sany mıllıondaǵan adamdy qurap otyr.
Aıan ÁBDÝÁLI,
«Egemen Qazaqstan»