Áıgili fýtbolshy, bes dúrkin «Altyn dop» júldesiniń ıegeri Lıonel Messı kezekti daýdyń ortasynda qaldy. Jaqynda ǵana Argentına quramasynyń sapynda Amerıka kýbogy týrnıriniń fınaldyq oıynynda jeńilis tapqan oǵan salyq máselesi qosymsha soqqy bolyp tıdi. Birer kún buryn Ispanııa soty ákesi Horhe men ózine 4,1 mıllıon eýro kóleminde salyq tóleýden jaltardy degen aıyp taqty.
«Jyǵylǵan ústine judyryq» demekshi, alǵashynda 1,5 mıllıon eýro aıyppul tólep qutylýyna bolady degen aqpar taraǵan. Alaıda, kóp uzamaı sot ákesi ekeýin 21 aıǵa bas bostandyǵynan aıyrý týraly úkim shyǵardy. Biraq, memleket zańy boıynsha, uzaqtyǵy 2 jyldan kem kez kelgen jazany synaq merzimimen óteýge bolady eken. Osyǵan baılanysty sarapshylar fýtbolshy men ákesiniń temir torǵa toǵytylýy ekitalaı degen pikirde.
Otyrys barysynda sot Danone, Adidas, Pepsi-Cola jáne basqa da kompanııalarmen jasasqan jarnamalyq kelisimsharttaryn qarap shyqty. «Barselona» fýtbol klýbynyń shabýylshysyna 2 mıllıon eýro, al ákesi Horhe Messıge 1,5 mıllıon eýro aıyppul tóleýdi mindettedi. Olar joǵarǵy sotqa aryz berýge quqyly.
Advokattary salyqtan jaltardy degen aıyptyń esh negizsiz ekenin ári aldaǵy ýaqytta sot úkimine shaǵym túsiretinderin málimdedi.
Aıta keteıik, Lıonel Messı «Altyn dopty» eń kóp ıelengen fýtbolshy. Al úzdik surmergenderge beriletin «Altyn býtsy» syılyǵyn úsh márte jeńip alǵan. Búginde «Barselonanyń» jáne Argentına qurama komandasynyń tarıhynda eń kóp gol soqqan fýtbolshy.
Aıan ÁBDÝÁLI,
«Egemen Qazaqstan»