Kósh túzep zamananyń saltyna ergen,
Tańyrqap dúnıeniń halqy kórgen,
Taǵylǵan Qazaqstan keýdesine,
Astana – jarqyraǵan Altyn orden.
Bir shyńnan qadam bastyq bir shyńǵa alyp,
Bárin de otyr búgin jurtym baǵyp.
Aqorda – aq júregi qazaǵymnyń,
Tynymsyz soǵyp turǵan dúrsil qaǵyp.
Ashyldy bolashaqqa Qaqpa tyńnan,
Muńy bar babalardyń jasta tunǵan.
Han Shatyr – aq qalpaǵy alshy kıgen,
Kóp úıler – kóp sarbazy sapta turǵan.
Biz úshin Táýelsizdik – sarqylmas án,
Men búgin qadamymdy jarqyn basam.
Kótergen bostandyqtyń shańyraǵyn,
Báıterek – baǵa jetpes altyn baqan.
Tósinde án men kúıge Arqanyń baı,
Maǵan da jarasady salsam «Ýgáı...».
Jol bitken túıisedi osynda kep,
Tus-tustan taramdanǵan qan tamyrdaı...
Betke alyp tartyp kelem arman-beldi,
Iiskep babam teri tamǵan jerdi.
Asqar taý, aǵyndy ózen, mıdaı dala –
Bári de eski kúnnen qalǵan belgi.
Aldy azap boldy ómirdiń, arty baqyt,
Aspanǵa jatyr bórkin halqym atyp.
Qaraıdy Qazaqstan bar álemge,
Nur shashqan Kún keýdesin jarqyratyp.
О́tti ǵoı qaharly qys, doly kóktem,
Zamannyń ár kezeńi bolyp óktem.
Bul da bir dáýreni ǵoı shalqıtuǵyn,
Qazaqtyń erkindikke qoly jetken.
Qonaqtar kep jatady dúrkin-dúrkin,
Bar shyǵar tartatyn bir tylsym, múmkin!
Tósinde Saryarqanyń oınaq salǵan,
О́tedi-aý bizdiń bastan, shirkin, bul kún.
Tamasha bir kórikti Esil berdi,
Kúndiz dep aıtqan durys keshin de endi.
Kútedi odan halyq jaqsylyqty,
Kútedi odan halyq sheshimderdi.
Qolynda shytyrlaıdy kók teńgeler,
Oınaıdy arpalysyp otpen neler.
Tósine Saryarqanyń damyldaıtyn,
Kóshi de toqtamasyn shetten keler.
Alysqa usha bersin arman qusy,
Pendeniń taýsylmaıdy jalǵanda isi.
Qazaqtyń júreginde saqtalady,
Ony ákep Saryarqaǵa salǵan Kisi.
Boıda bar qurysh qaırat, jasyn jiger,
Jalǵandy jalpaǵynan basyp júrer,
Kirgizip sáni menen saltanatyn,
Basqarǵan umytpaıdy ákimdi de el.
Otyrmyn erik berip tizginge men,
Bir túrli kóńilim shat, qyzǵyn denem.
Shertedi shejiresin ótken kúnniń,
Bir kúni, oqysa urpaq, bizdiń de óleń.
Saparda san qaıtara kósh túzediń,
Dep eldi Ujymaqqa jetkizemin.
Tarıhyń tym áriden bastalady,
Soǵan saı keleshegiń sheksiz, Elim!
Aýyt MUQIBEK