«Egemen Qazaqstan» gazetine jańa basshy taǵaıyndaldy

Keshe «Egemen Qazaqstan» gazetine kelgen Aqparat jáne kommýnıkasııalar mınıstri Dáýren Abaev «Egemen Qazaq­stan» respýb­lıkalyq gazeti» aksıo­nerlik qoǵamynyń jańa bas­shysy halyqaralyq Túrki akade­mııa­synyń prezıdenti, tarıh ǵylymdarynyń doktory Darhan Qýandyquly Qydyrálini gazet ujymymen tanystyrdy. Ol ǵasyrlyq toıy jaqyndap qalǵan aǵa basylymnyń tarıhyna qysqasha toqtalyp, onda talaı arystar qoltańbalaryn qaldyrǵanyn, gazet qashanda halyq múddesi men eldikti jazyp kelgenin jáne aldaǵy ýaqytta da jańa talaptar deńgeıinen tabylatyndyǵyn aıtyp ótti. О́zderińiz bilesizder, qazirgi tańda buqaralyq aqparat quraldaryna jańa talaptar qoıylyp otyr. Medıa keńistikte básekelestik kúshine endi. Osyǵan barlyq buqaralyq aqparat quraldary ıkemdelýi tıis. Bárinen buryn, jańa talaptarǵa baılanysty oqyrman talaptary da eskerilýi tıis. Aqparatty qysqa ári nusqa berý júzege asyrylýy kerek, degen D.Abaev, odan ári jýrnalıster úshin aýdıtorııany tereń zertteý, jazylar materıaldardyń kólemin yqshamdaý, Internet saıtyn jetildirý sekildi de ja­ńa talaptar qoıdy. Sol sııaq­ty mınıstr gazettiń 100 jyl­dyǵyna daıyndalý barysyn, «Egemen» kitaphanasy» serııasymen kitaptar shyǵarý sekildi máselelerge mán berdi.  «Burynǵy basshy Erkin Qydyrǵa gazettiń jáne jalpy otandyq baspasózdiń damýyna qosqan úlesi úshin alǵys bildiremin. Buǵan deıin ózin bilikti basshy retinde kórsete bilgen Darhan Qydyráli ǵasyrlyq tarıhy bar «Egemenniń» eldigimizdi nyǵaıtý jolyndaǵy isterin odan ári jalǵastyryp, gazetti jańa deńgeıge kóteredi dep senemin», – dedi mınıstr. Budan keıin gazettiń bu­ryn­ǵy basshysy Erkin Qydyr jáne osy basylym basqarma tór­aǵa­synyń orynbasary – bas redaktor Janbolat Aýpbaev sóz alyp, mınıstrdiń alǵa qoıǵan tapsyrmalarynyń sózsiz júze­ge asatynyn, gazetti jańa talap­tarǵa saı jaqsartý odan ári jalǵa­syn taba beretindigin, bul jol­­da birlesip keleli jumys isteı­tindikterine úlken senim bildirdi. «Egemen-aqparat»