Oral óńiri aýmaǵynda alynǵan kez kelgen taýar úshin kók tıyn tólenbeıtin tegin dúkender júıesi ashyla bastady.
Dúken ıeleri adamdarǵa qaıyrymdylyq pen qamqorlyq jasaýdy ózderiniń basty muraty dep sanaıdy. Sondyqtan da olar kóp balaly, turmysy tómen otbasylarǵa jáne zeınetkerler men múgedekterge arnalǵan tegin dúkender ashýdy jón kóripti. Kapıtalıstik qoǵam sıpatyndaǵy búgingi kezde árkimniń jáne ár otbasynyń jaı-kúıi ártúrli ekeni talas týǵyzbaıdy. О́ıtkeni, ómirdiń jazylmaǵan zańy solaı. Barlyq adamzat ókilderiniń materıaldyq jaǵdaıy men moraldyq bet-beıneleri birdeı bolýy esh múmkin emes. Bireý baı, bireý ortasha, bireý kedeı bolýy o bastan tirshiliktiń qaǵıdasy ispettes.
Oblystaǵy tegin dúkender júıesi tuńǵysh ret Zelenov aýdanynda qurylǵan. Zelenov aýyldyq okrýgi ardagerler keńesiniń tóraıymy Roza Aıtýǵanovanyń aıtýynsha, jańa bastamany joǵaryda atalǵan áleýmettik toptar jatyrqaı qoımapty. Munda bas suqqan tutynýshy ózderine qajetti kıimderdi tegin ala alady. Eskire qoımaǵan, kııýge ábden jaramdy bul kıimder dáýletti adamdar arasynan qabyldanǵan. Kópshilik jaǵdaıda olar ózderinen artylǵan, tipti, múldem kıilmegen kıimderdi óz erikterimen ákelip tapsyrady eken.
Taǵy bir aıta keterlik másele, tegin taýarlar dúkeninde tek kıim ǵana emes, sonymen birge ydys-aıaqtar men turmystyq tehnıkalar jáne kitaptar men áshekeılik buıymdar da bar ekenine kóz jetkizdik. Aıtalyq, ózimiz kýá bolǵandaı, Zelenov aýylyndaǵy tegin taýarlar dúkeninde zeınetker meıirimi mol jan Mádıne Qajyǵalıqyzy taýar alýǵa tilek bildirýshilerge qajetti qyzmet kórsetýdi ádetine aınaldyrypty. Sondaı-aq, atalǵan aýyldyq okrýgtiń ákimi Izǵalı Dáýletov tegin taýarlar dúkenine eki bólme bólingenin aıtyp berdi. Mundaıda bárekeldi demegende ne demekpiz?!
Temir QUSAIYN,
«Egemen Qazaqstan»
Batys Qazaqstan oblysy,
Zelenov aýdany