Tehnologııanyń otany sanalatyn Japonııada taǵy bir tyń dúnıe jasap shyǵaryldy. О́zdiginen júretin, júrgizýshini qajet etpeıtin kólikter bir kezderi beınebir eles sııaqty kórinetin edi. Endi, mine, ol da shyndyqqa aınalǵandaı.
Kúnshyǵys elinde ınjener mamandary tek elektr qýatymen ári adamnyń basqarýynsyz qozǵalatyn shaǵyn avtobýstar qurastyryp shyǵardy. Salonyna barlyǵy 12 adam sııady. Sonymen qatar, onyń ishine qart kisiler men múmkindigi shekteýli jandardy mingizip, túsirýge arnalǵan arnaıy qurylǵy ornatylǵan. Málimetterge qaraǵanda, saǵatyna 40 shaqyrym jyldamdyqpen júre alady. Al GPS navıgasııasy arqyly artqa qaraı qozǵalady.
Jańadan shyqqan kólikter aldymyzdaǵy tamyz aıynan bastap halyqqa qyzmet kórsetýdi bastaıdy. Tolyq tájirıbeden ótkennen keıin bılik 2020 jyly Tokıo Olımpıadasyna kelgenderdi dál osy qoǵamdyq kólikpen tasymaldamaq nıette.
Aıta keteıik, Japonııada osydan birer jyl buryn dál osyǵan uqsas júk kólikteri synaqtan ótken. Júrgizýshisiz júretin kólikter synaq barysynda bir syzyqty boılap, birdeı aralyqty saqtap, birneshe saǵat boıyna 80 kılometr jyldamdyqpen júrip otyrǵan. Bul erejelerdi saqtaý úshin arnaıy júıe ornatylypty. Ár kólikke baqylaýshy adam otyryp, qoıylǵan júıeniń qanshalyqty júzege asqanyn teksergen eken.
Aıan ÁBDÝÁLI,
«Egemen Qazaqstan»