Donald Tramptyń kúıeý balasy – partızandar urpaǵy
AQSh prezıdenttigine úmitker, mıllıarder Donald Tramptyń Ivanka esimdi qyzy belorýs partızanynyń nemeresine kúıeýge tıgen bolyp shyqty.
The New York Observer gazetine bergen suhbatynda Tramptyń kúıeý balasy Djared Kýshner kútpegen jerden óziniń Grodno oblysyndaǵy Novgrýdok qalasynda týyp-ósken baıyrǵy partızanynyń tikeleı urpaǵy ekenin aıtyp berdi. Onyń atasy men ájesi 1943 jyly belorýs ormandarynyń birinde tabysypty.
Adamnyń eń jaqyn dosy eshki me?
Londonnyń koroleva Marııa ýnıversıtetiniń bıologtary eshkilerdiń qabiletteri ıtter men jylqylardan eshbir tómen emes degen tujyrym jasady.
Ǵalymdar tájirıbe jasaý barysynda eshkilerdiń úı janýarlary ishindegi eń aqyldylarynyń biri ekenine kóz jetkizipti. Olar qashanda adamdardyń ártúrli áreketterine jaýap qaıtaryp, olarǵa qıyn kezderde kómekke kele alady. Eshkiler adamnyń kóńil-kúıine qaraı ózderin de ózgertip turady.
Itterdiń úılený toıy ıesine 2000 fýntqa tústi
Ulybrıtanııada turatyn bir áıel óziniń eki ıtin úılendirip, sol sharaǵa 2000 fýnt sterlıng aqsha jaratty.
Áıeldiń shı-sý tuqymdas ıtterin jaqsy kóretini sonshalyq, ol bulardy úılendirýdi orasan zor shoýǵa aınaldyryp jiberipti. Muny ol toıdyń barlyq salt-dástúrlerine saı jasap shyqqan. Atap aıtqanda, qalyńdyqqa aq kóılek, kúıeý jigitke qara smokıng kıgizgen. Tipti, toıdyń arnaıy torty men áshekeıleri de bolypty. Bylaısha, bárin adamdardyń toılaryndaı etip uıymdastyrǵan. Jomart áıel óziniń tárbıesindegi ıtteriniń bul toıyna 2000 fýnt aqsha shyǵarypty. Al «baqytty juptyń» attary Elvıs jáne Bella bolyp keledi. Olardyń Belvıs degen kúshikteri de bar kórinedi.
Bir sabaq júzimniń baǵasy - $10 900
Japonııada bir sabaq júzim 11 myń dollarǵa jýyq aqshaǵa satylyp, taǵy bir álemdik rekord tirkeldi.
Eldegi sýpermarketterdiń biriniń qojaıyny 30 dana júzimniń árbirine 360 dollardan aqsha tólep, onyń sol sabaǵy úshin 11 900 dollar qarjy shyǵarýǵa májbúr bolǵan. Al erekshe tátti dámi bar júzim «Laǵyldy rımdikter» dep atalady. Ol Japonııanyń Isıkava prefektýrasynda ósirilip, birinshi ret saýdaǵa shyǵarylyp tur eken. О́tken jyly bul elde eki dana qaýyn 12 myń dollarǵa satylǵan bolatyn.
61 jasynda balpanaqtaı ul týǵan
Qytaıdyń Chjedzıan provınsııasynda turatyn 61 jastaǵy zeınetker áıel perzentti boldy.
Buǵan Chan esimdi áıel men onyń 66 jastaǵy kúıeýi 30 jasar qyzdary aýyr naýqastan qaıtys bolǵannan keıin barǵan. Olar qoldan uryqtandyrý jolymen balaly bolýǵa sheshim qabyldapty. Chjedzıan ýnıversıteti janyndaǵy aýrýhana aǵa akýsheriniń aıtýynsha, Chan osylaısha aımaqtaǵy eń jasy úlken ana bolyp otyr.
Jas jubaılar sý astynda júzik almasty
Reseıdiń Nıjnıı Novgorod qalasynda turatyn Pavel jáne Elena Sıdnevalar ózderiniń úılený toıyn aldynda júzik almasý rásimderin 10 metrlik tereńdiktegi sý astynda ótkizdi.
Qazir Pavel sýda júzý nusqaýshysy bolyp jumys isteıtini, al Elenanyń eki jyldan beri daıvıngpen aınalysatyny belgili bolyp otyr. Olar Avtozavodsk AHAJ-yna tirkelgennen keıin Versmen aýdanyna attanyp, sýy keremet taza Klıýchık kóline túsken. Munda talaı márte túsip kelgen Pavel bul joly qalyńdyǵyn sońynan ertken. Ras, olar sý astynda bir-birlerine shyn emes, folgadan jasalǵan júzikter kıgizgen.
«Joly bolǵysh» sıyrdy jaı oǵy da jaırata almady
Avstrııanyń Zalsbýrg qalasynyń túbindegi fermada tabynnyń 19 sıyryna bir mezgilde naızaǵaı tústi. Solardyń 18-i birden til tartpaı ketse, bireýi ǵaıyptan taıyp, tiri qalǵan.
Bir qyzyǵy, aman qalǵan sıyrdyń laqap aty nemis tilinen aýdarǵanda, «Joly bolǵysh» eken. Bas baqtashy Georg Býheggerdiń aıtýynsha, oqıǵa sıyrlar jaýynnan qashyp, alyp shyrsha aǵashynyń túbine tyǵylǵan kezde oryn alǵan. Sol kezde daraqqa jaı túsip, 18 iri qara birden ólip ketken. Al «Joly bolǵysh» degen aty bar sıyrǵa tıtteı de zalal kelmegen.
Aqparat agenttikteriniń materıaldary negizinde daıyndaldy