[caption id="attachment_50677" align="aligncenter" width="560"] Foto: vk.com[/caption]
Eýropa chempıonatynyń fınalynda synǵa túsken Portýgalııa men Fransııa quramalary Sen-Denı qalasynda kezdesti.
Portýgalııa – Fransııa 1:0 (0:0, 0:0, 0:0)
Stadıon: «Stad-de-Frans».
Tóreshi: Mark Klattenbýrg.
Portýgalııa: Rýı Patrısıý, Sedrık, Pepe, Joze Fonte, Rafael Gerreırý, Vılıam Karvalıý, Adrıen Sılva (Joaý Moýtınıý 66), Renatý Sanshesh (Eder 79), Joaý Marıý, Lýısh Nanı, Krıshtıaný Ronaldý (Rıkardý Kýarejma 25).
Fransııa: Ýgo Lorıs, Bakarı Sanıa, Loran Koselnı, Samıýel Ýmtıtı, Patrıs Evra, Blez Matıýıdı, Pol Pogba, Mýssa Sıssoko (Antonı Marsıal 110), Dımıtrı Paıe (Kıngslı Koman 58), Antýan Grızmann, Olıve Jırý (Andre-Per-Jınıak 78).
Gol: Eder 109.
Eskertý alǵandar: Sedrık 34, Joaý Marıý 62, Rafael Gerreırý 95, Rıkardý Karvalıý 98 Joze Fonte 119 Rýı Patrısıý 120 – Samıýel Iýmtıtı 80, Blez Matıýıdı 97, Loran Koselnı 107, Pol Pogba 115.
Dúbirli dodanynyń toptyq kezeńinde barlyq úsh oıynyn teń aıaqtaǵan Portýgalııa quramasyn chempıon atanady dep portýgaldardan basqa eshkim oılamaǵan bolsa kerek. Fınaldyq kezdesýge deıin sylbyr óner kórsetken portýgaldar Eýropa chempıonatynyń basty favorıt komandasyn jeńip, alǵashqy kýboktaryna qol jetkizdi.
[caption id="attachment_50680" align="aligncenter" width="560"] Foto: vk.com[/caption]
Kezdesý portýgaldar úshin asa sátti bastala qoımady. Fransýzdardyń oıyn bastala sala qaýipti shabýyldaryna tek qaqpashy Rýı Patrısıý ǵana qarsy tura aldy. Al komandanyń úmit artyp otyrǵan basty juldyzy Krıshtıaný Ronaldý Dımıtrı Paımen dopqa talas kezinde jaraqat alyp, 25-mınýtta alańnan shyǵyp ketkeni aýyr soqqy bolyp tıdi. Degenmen, Fernandý Santýsh shákirtteri jumylǵan judyryqtaı qarsylastarynyń pármenine laıyqty túrde tosqaýyl bola bildi. Antýan Grızmann, Mýssa Sıssoko syndy daryndy fýtbolshylardyń birqatar qaýipti soqqylaryn der kezinde qaıtaryp úlgerdi.
[caption id="attachment_50681" align="aligncenter" width="560"] Foto: ua-football.com[/caption]
Oıynnyń negizgi 90 mınýty aıaqtalǵannan keıin ereje boıynsha, 15 mınýttan turatyn 2 taımdyq ekstra-taım berildi. 109-mınýtta alańǵa Renatý Sansheshtiń ornyna shyqqan Eder qarsylasy Loran Koselnıden aılasyn asyryp baryp, 25-30 metr jerden týra kózdep soqqy jasap edi, Ýgo Lorıstiń qaqpasynan bir-aq shyqty. Fransýzdar osydan soń baryn salyp esepti teńestirmek bolǵan, alaıda portýgaldardyń qorǵanysynan óte almady.
[caption id="attachment_50683" align="aligncenter" width="560"] Foto: vk.com[/caption]
Al qorǵanysta óte saýatty oınaǵan Pepe fınaldyq kezdesýdiń úzdik oıynshysy atandy.
Aıan ÁBDÝÁLI