Zaısan aýdany Qarabulaq aýylynyń kireberisindegi eki mal qorasy birden kózge shalynady. Bul jerde taýarly-sút fermasy qurylyp, qazir sıyr saýyp, qymyz pisýmen birneshe adam shuǵyldanýda. Ferma janyndaǵy úıge kirgenimizde kúbi pisip jatqan eki kelinshekti jolyqtyrdyq. Olar Marjan Ábdirahmanova men Almagúl Eńsebaeva dep tanystyrdy ózderin. Qos kelinshek kúnine 25 sıyr saýady eken. Jıyrmaǵa tarta bıe saýyp, qymyzdy aýdan turǵyndaryna satyp jatyr. Dámi til úıirgen qymyzǵa suranys úlken. Tipti, aýdannyń Qaratal, Qarabulaq aýyldary men Zaısannan aldyn ala tapsyrys túsip jatyr. Aǵaıyndy Serik, Qaırat, Jeńis Ámirenovter basqaratyn «Murager», «Ámire», «Ámiren» sharýa qojalyqtary aýdannyń ekonomıkasyna eleýli úles qosyp keledi. Al Qaırattyń «Murager» qojalyǵy aýdanda birinshi bolyp taýarly-sút fermasyn qurýdy qolǵa alypty.
Serikti burynnan tanımyz. Sekeń men jubaıy Gaýharııanyń qyzy Aıaýlym qazaq qyzdarynyń ishinde birinshi bolyp sporttyń eń kúrdeli túri – frıstaıldy meńgere bastady. О́jet qyz tórt jasynda shańǵyǵa turyp, ony ıgergen soń frıstaılmen myqtap shuǵyldandy. 2010 jyly elimizdiń jastar arasyndaǵy I Qysqy oıyndarynda frıstaıldyń mogýl túrinen juptasýda altynnan alqa taqsa, frıstaıl-mogýlda ekinshi, al frıstaıl-akrobatıkada úshinshi oryndy ıelengen edi.
– Elbasynyń Qazaqstan halqyna Joldaýynda taýarly-sút fermasyn qurý, adamdardy jumyspen qamtamasyz etý mindeti qoıylǵany belgili. Oblys ákimi D.Ahmetov ótken jyly aýdanda bolǵan kezde taýarly-sút fermasyn qurýdy tapsyrǵan edi. Bul isti qolǵa aldyq. 3 jyl buryn Kókpekti aýdanynan «Sımmental» tuqymdy 100 sıyr satyp aldyq. Al «Jaby» tuqymdy jylqy ózimizdiki. Qazir súttiń lıtrin 70 teńgeden satýdamyz. Artyǵy bolsa qurt qaınatyp, maı alamyz. Qurt pen irimshikke de suranys bar. Istiń kózin tapsań, tabys tabýǵa bolady. Shynar Bektembetova jalǵyz ózi 20 bıeni saýyp jatyr. Qojalyqtaǵy qyz-kelinshekterdiń barlyǵy óz mamandyǵyn sheber meńgergender, – dedi Serik Ámirenov.
– Aýdanda sút zaýyty jumys istep tur. Aıdar Barysov basqaratyn sút zaýytynyń keleshegi bar. Problema – qys mezgilinde sút tapshylyǵy. Sol úshin taýarly-sút fermasyn qurǵanbyz. Ol tolyq qýatyna engende qajetti ónimdermen aýdan turǵyndaryn qamtamasyz etýge múmkindik týady, – deıdi aýdan ákimi Temirbek Qasymjanov.
Qazir qojalyqta 500 jylqy, 500 iri qara bar. Sıyrdy 150 basqa, bıeni 40-qa jetkizý mindeti tur. Ekinshi mal qorasynyń qurylysy aıaqtalǵan soń jylqy osynda qystaıtyn bolady.
Ońdasyn ELÝBAI,
jýrnalıst
Shyǵys Qazaqstan oblysy,
Zaısan aýdany
Sýretterdi túsirgen avtor