Eline qaıtpaý úshin pasportyn jep qoıdy
Fransııada jurt kútpegen bir oqıǵa oryn aldy – óz otanyna deportasııa jasalýyna kelispegen gambııalyq oppozısıoner polıseılerdiń kóz aldynda óz pasportynyń birneshe paraǵyn jep qoıdy.
Oqıǵa Týlýza qalasynda oryn alǵan. Fransýz bıligi Afrıkanyń Gambııa memleketiniń 34 jastaǵy Býbakar esimdi turǵynyna baspana berýden bas tartady. Munda jasyryn jolmen kelgen muǵadjyr óz eline qaıtarylý úshin ushaqqa ákelingennen «buzyla» bastaıdy. Al bortqa otyrǵyzylar aldynda qujatyn kórsetip jatqanda, ony jalma-jan jyrtyp, paraqshalaryn aýzyna salyp jutýǵa kirisedi. Munymen de toqtamaı tártip saqshylarynyń betterine túkiredi. Muny kórgen pılot ushý kezinde qaýip tóndiredi dep eseptep, ony almaı ketipti.
Júktiligine 17 aı bolsa da, bosanar emes
Qytaıdyń Hýnan provınsııasynyń turǵyny júktiligi merziminiń uzaqtyǵy jaǵynan Gınnestiń álemdik rekordtar kitabyna enetindeı nátıje kórsetti.
Buqaralyq aqparat quraldary qazir Van Shı atty áıeldiń ótken jyldyń aqpan aıynan beri ekiqabat ekenin jazyp jatyr. Dárigerler sol kezde bala 15 qarasha kúni týylady degen boljam jasap bergen eken. Alaıda, sodan beri qansha ýaqyt ótse de, kelinshektiń bosanar túri joq. Sondyqtan oǵan kelesi aıda ota jasalmaqshy.
Aralar adamdy ashtyq pen aýrýdan saqtap qalady
Ǵalymdar qazir tap osyndaı qorytyndyǵa kelip otyr. Olar bal aralarynyń adamdy aýrýdan qorǵap, ashtyqtan saqtap qalatynyna senimdi.
Mamandar adamǵa óte kóp paıdasy bar ǵajaıyp zat – bal ekenin alǵa tartady. Olar baldyń adam aǵzasyna tıgizetin paıdasynyń ushan-teńiz ekenin aıtady. Onyń basty paıdasy kez kelgen vırýs pen mıkrobqa qarsy belsene kúrese alatynynan kórinedi. Bal sondaı-aq adamzat balasyna zııandy mıkroorganızmdermen, dári-dármekterdiń zalaldarymen kúresýge jaqsy kómektesedi.
Jalańash Tramp...AQSh-tyń 5 qalasynda tur
Qurama Shtattardyń 5 qalasynda Respýblıkashylar partııasy atynan AQSh prezıdenttigine úmitker Donald Tramptyń jalańash keıiptegi músini paıda boldy.
Mıllıarderdiń eskertkishin Indecline anarhıster toby jasatqan kórinedi. Olar Nıý-Iork, Los-Andjeles, San-Fransısko, Klıvlend jáne Sıetl qalalarynyń kórnekti jerlerine qoıylypty. «Bizge unaı ma, unamaı ma, másele onda emes, Tramp qazirdiń ózinde álem mádenıetindegi aty ańyzǵa aınalǵan tulǵa. Tarıhta mundaı adamdardyń keskinderi qashanda taspen qashalyp, máńgilik tulǵalar retinde qurmettelip otyrǵan», – dep sanaıdy jobany jasaýshylardyń biri.
Kúıeýin qaıtarý úshin 17 aılyq qyzyn qurban etti
Amerıkanyń Ońtústik Karolına shtatynyń polısııasy 23 jastaǵy Kımberlı Martınesti óziniń bir jarym jastaǵy qyzyn óltirdi degen aıyppen tutqyndady.
Áıel ótken jeksenbi kúni qutqarý qyzmetine telefon shalyp, 17 aılyq qyzy Peıtonnyń bezgekpen aýyryp jatqanyn jetkizedi. Teksere kelgende, Martınestiń balaǵa zorlap tuz jegizgeni anyqtalady. Osydan qyzda gıpernatrıemııa paıda bolǵan. Keıin ol jansaqtaý bóliminde jantásilim etedi. Kımberlıdiń advokatynyń aıtýynsha, kelinshek ketip qalǵan kúıeýin osyndaı jolmen qaıtaryp almaqshy bolypty. Munyń ornyna ol endi aldaǵy 20 jylyn túrmede ótkizýi múmkin.
Saýdtardyń dástúri adam ómirine qaýipti
Saýd Arabııasynda úılený toılary kezinde kópten beri bir mezgilde birneshe qarýdan aspanǵa oq atý atty merekelik úrdis bar. Keıde munyń sońy qaıǵyly jaǵdaılarǵa dýshar etip jatady.
Sońǵy joly koroldiktiń teristigindegi Týraıf qalasynda ótken úılený toıynda atylǵan oqtyń biri jazataıym bir áıelge tıip ketip, qatty jaraqatpen aýrýhanaǵa túsken. Qazir 40-tan asqan áıeldiń ómiri úshin dárigerler kúresip jatyr. Osyǵan baılanysty polısııa toıdyń ótýine jaýapty 4 adamdy qamaýǵa aldy. Qalada budan 4 kún buryn sondaı jaǵdaıda 20 jasar qonaq ta qatty jaralanyp qalǵan eken.
Aqparat agenttikteriniń materıaldary boıynsha daıyndaldy