Memleket basshysy Qazaq ulttyq horeografııa akademııasynyń ashylý rásimine qatysty. Bul týraly akorda.kz habarlady.
Rásimdi ashqan Nursultan Nazarbaev qazaqstandyqtardy elordada jańa joǵary oqý ornynyń boı kóterýimen quttyqtady.
«Búgin biz Astanada jańa óner ordasyn saltanatty túrde ashyp otyrmyz. Bul jerde ulttyq balet pen bı sheberleriniń jańa shoǵyry oqyp-tárbıelenedi. Munda qazaqstandyq salt-dástúr damyp, álemdik deńgeıdegi bı ónerin damytýǵa jańasha qadamdar jasalatyn bolady. Ulttyq horeografııa akademııasy – bizdiń elimizde ǵana emes, búkil Ortalyq Azııa elderindegi osy úlgidegi alǵashqy joǵary oqý orny. Onda qazaqstandyqtarmen birge ózge shet elderdiń shyǵarmashyl daryndy jastary oqıtyn bolady. Elimizdegi bul akademııa ýaqyt óte kele búkil Eýrazııadaǵy balet pen bı sheberlerin daıyndaıtyn jetekshi ortalyqtardyń biri bolatynyna senemin», – dedi Qazaqstan Prezıdenti.
Memleket basshysy akademııadaǵy oqý isi bı men balet óneriniń negizderinen bastap joǵary oqý ornynan keıingi magıstrler men doktoranttardy daıyndaýǵa deıingi bilim berý úrdisiniń barlyq deńgeıin qamtıtynyn atap ótti.
«Bul kóp deńgeıli kásibı horeografııalyq bilim beretin tolyq sıkldy akademııanyń mańyzdylyǵy men biregeıligin eskere otyryp, oǵan meniń jarlyǵymmen «ulttyq joǵary oqý orny» aıryqsha mártebesi berildi. Sizder osy jańa óner ordasynda joǵary halyqaralyq ólshem men bilim berýdiń otandyq qaıtalanbas standartyn qalyptastyrýǵa tıissizder. Sizder Qazaqstannyń bı men balet óneriniń jańa ulttyq brendin ornyqtyrady dep senemin», – dedi Nursultan Nazarbaev.
Sondaı-aq, Qazaqstan Prezıdenti oqý ornynyń bıýdjetten tys qarajat kózderine salynǵanyn aıtyp, sáýletshiler men qurylysshylarǵa atqarǵan jumystary men shyǵarmashylyq eńbekteri úshin alǵys bildirdi.
Rásim barysynda Nursultan Nazarbaev akademııa rektory A.Asylmuratovaǵa balerınanyń shaǵyn músinin tabys etti.
«Bul músindi túlekter jyl saıyn birinshi synyp oqýshylaryna tabystaıdy, ol balet ártisteriniń kásibı deńgeıiniń ósýiniń jalǵastyǵy men akademııanyń dástúrler sabaqtastyǵynyń sımvoly bolady», – dedi Elbasy.
Qazaqstan Prezıdenti akademııanyń Qurmetti qonaqtar kitabyna qoltańba jáne «Ýaqyt kapsýlasyna» estelik jazba qaldyrdy. Budan bólek, Elbasy balet zalyn, jataqhanany, ashana men birinshi synyp oqýshylaryna arnalǵan oqý synyptaryn aralap kórdi.
Nursultan Nazarbaev saltanattyń qorytyndysy boıynsha ótken brıfıng barysynda barsha qazaqstandyqtardy kele jatqan Bilim kúnimen quttyqtap, oqýshylarǵa, ata-analar men muǵalimderge tabys pen myqty densaýlyq tiledi.
Aıdar О́RISBAEV