Aq jaýlyǵy jelbirep, aqsha júzi eljirep, Zeınep apa «Egemenge» taǵy kele jatyr eken. Taǵy deıtinim, bul kisi bizdiń redaksııaǵa kúnde bolmaǵanymen, jıi bas suǵady. Turaqty oqyrmanymyz. Jınap qoıǵan bir býma gazetti redaksııadan ózi alyp ketedi. «Qansha degenmen, qalanyń ishindesiz, qazir gazetti jetkizýdiń basqa da joldary bar emes pe, nege áýre bolasyz», deımiz gazet alýǵa sonaý jerden avtobýspen kelip júrgen qarııanyń qajyryna qaıran qalyp.
Qalaı degenmen, seksenniń seńgirine taqaǵan jasy bar. Biraq bul oqyrmanymyzdyń artyqshylyǵy da osynda, óziniń sózimen aıtqanda, «gazetti óz aıaǵymen kelip, óz qolymen» alǵandy unatady. Osylaısha, gazet oqýdy ómirlik ádetine aınaldyrǵan erekshe oqyrman «Egemenniń» eshbir nómirin qalt jibermeıdi. «Egemenińiz» ne, bul kisi «Sosıalıstik Qazaqstannan» bergi turaqty oqyrman.
Qarııa qasyna qatarlasa qosylǵan meni birden tanı qoımasa da, amandyǵyma meıirimmen jaýap qatyp, ańqyldaı sóılep, máre-sáre bolyp qaldy. Bul da bolsa, onyń el gazeti – «Egemenge», ondaǵy egemendikterge degen erekshe qurmeti. «Egemen» eldiń bas basylymy, eldiń búkil tynys-tirshiliginiń aınasy ǵoı. Allaǵa shúkir, kózim amanda «Egemenimdi» oqyp ótemin», deıdi Zeınep Qubashqyzy. Súısinesiń. Gazetke degen qushtarlyqtan qýat alǵan qarııanyń qaıratyna qyzyǵasyń.
Oıpyrym-aı, osy «jurt gazet oqymaıdy» degendi kim aıtty eken?! Kerisinshe, zaman ozǵan saıyn oqymysty kóp qazir. Shúkir, oqysam, bilsem deıtin urpaqtyń umtylysy ushqyr. Ár oqyrman ár basylymnan ózine keregin izdeıdi. Bireý burynǵysha qaǵaz túrin qolaıly kórse, endi biri Internetke ıkemdi. Soǵan saı basylymdar da basty talaptarǵa basymdyq berip, oqyrmannyń suranysynan shyǵýǵa tyrysady. Qalaı bolǵanda da, bireý izdenip oqyr, bireý qajettilikten oqyr, bastysy, oqyrmansyz gazet joq.
Árıne, gazet úshin árbir oqyrman mańyzdy. Alaıda 78-de jasy bar aq jaýlyqty ananyń bas basylymǵa bas ıip, qarashańyraqqa qurmetpen qaraýynyń jóni bir bólek eken.
Dınara BITIKOVA,
«Egemen Qazaqstan»
ASTANA
Sýretti túsirgen
Erlan OMAROV,
«Egemen Qazaqstan»