«Jerde bir jetim qýansa, kókte myń perishte shattanady» degendi myń qubyltyp aıtyp júrsek te, máni – bireý. Búldirshinderdi qýantyp qana qoımaı, túrli qaýip-qaterden saqtandyryp otyrý da ózekti másele bolyp tabylady. Aıtpaı keletin jaýdyń biri – órt.
Osy máselege oraı, Almaty qalasynyń Tótenshe jaǵdaılar departamentiniń qyzmetkerleri Temirtaý qalasynan kelgen balalar men jasóspirimder teatrymen birlesip, qaladaǵy №1 Balalar úıinde «Pildiń balasy – órt sóndirýshi» spektaklin qoıyp berdi.
Osylaısha bir oqpen eki qoıandy atqan qyzyqty shara Almatyǵa alǵash gastroldik saparmen kelgen Temirtaý teatrynyń qoıylymdarymen úılese ketti. О́ıtkeni, bul kúnderi Almatyda órt qaýipsizdigi aılyǵy ótip jatqan bolatyn.
Balalarǵa órt qaýipsizdigi erejelerin buzyp, órteı jazdaǵan «Ottyq» degen qyz týraly qoıylym shynynda da unady. Kómekke pildiń balasy – órt sóndirýshi men ınspektor asyǵa kelip, ekeýi alapattyń aldyn alady.
Kóńildi, oıyn túrinde ótken kórinis balalarǵa kádimgideı qýanysh syılap, Temirtaý balalar men jasóspirimder teatrynyń akterleri rólderine berile oınap, búldirshinderdi qýantty.
Balalar da qoıylymǵa áserlene aralasyp, ertegi keıipkerlerin qoldap, olarǵa jandary ashyp, órtpen oınaǵannyń túbi ne bolatynyn, órt paıda bolǵanda ne isteý kerektigin uǵynyp otyrdy.
Kórinister aıaqtalǵan soń spektaklge kóńili tolǵan balalar da temirtaýlyq óner talanttaryna alǵys bildirdi.
– Qalaı desek te, ári qyzyqty ári paıdaly ótken sharanyń máni mol boldy. Búldirshinderdi jalyqtyrmaǵan qoıylym olardyń rýhanı jáne mádenı damýyna múmkindik týǵyzatyn, ómirge qaýip tónip, órt týyndaǵanynda sanaly áreket etýdi úıretetin, ártúrli jaǵdaılarda qarapaıym qımyl daǵdylaryn meńgerýge kómektesetin pedagogıkalyq ıdeıa iske asyryldy, – deıdi Almaty qalasynyń Tótenshe jaǵdaılar departamentiniń qyzmetkeri A.Núsipbaev.
Azamattyq qorǵaý maıorynyń aıtýynsha, munan bylaıǵy jerde balalar úıiniń tárbıelenýshilerine kelip turý almatylyq qutqarýshylar úshin dástúrge aınalmaq.
Aınash ESALI,
«Egemen Qazaqstan»
ALMATY