Keıki batyrdyń bas súıegin qalpyna keltirý jumysy bastaldy

13 qazan kúni Qazaqstan Respýblıkasy Elshiliginiń kómegimen Qazaqstan Respýblıkasynyń Ortalyq memlekettik mýzeıi Býdapesht qalasyna Keıki batyrdyń bas súıegin jetkizdi.

 Bul týraly Majarstandaǵy QR Elshisi Nurbaq Rústemov Feısbýk áleýmettik jelisinde habarlap otyr.

«Vengrııanyń jaratylystaný ǵylymdary mýzeıinde Qazaqstan Respýblıkasynyń Ortalyq memlekettik mýzeıiniń dırektory Nursan Álimbaı Vengrııa mýzeıiniń bas dırektory Zoltan Korshoshqa DNK saraptamasyn júrgizip, qalpyna keltirý úshin Keıki batyrdyń bas súıegin tapsyrdy. Mýzeıdiń antropologııalyq bólimine jetekshilik etetin Agnesh Kýshtar  Keıki batyrdyń bas súıegin qalpyna keltirý jumystaryn óz basshylyǵyna aldy»,- dep habarlaǵan Elshi N.Rústemov. Kezdesý barysynda N.Álimbaı majarlyq ǵylymdarǵa  1916 jylǵy ult-azattyq qozǵalysyna toıtarys bergen Keıki batyrdyń bas súıegi 93 jyl ótken soń Otanyna qaıtarylǵanyn jáne de batyrdyń bas súıegin qalpyna keltirý Qazaqstan úshin tarıhı oqıǵa ekenin atap ótken. Býdapeshtegi mýzeıdiń bas dırektory Zoltan Korshosh bolsa, osyndaı tarıhı mindetti senip tapsyrǵan qazaqstandyqtarǵa alǵys aıtyp, majarlyq ǵalymdar sońǵy tehnologııalardyń arqasynda sapaly jumys atqaratynyna sendirdi. «Aıta ketý kerek, Vengrııanyń jaratylystaný ǵylymdary mýzeıine bıyl 214 jyl toldy. Mýzeı ishinde 10 mıllıonǵa jýyq eksponat bar. Al antropologııalyq bólim 70 ret adamnyń bas súıegin qalpyna keltiretin tásilmen jumys istegen, sonyń ishinde Ábilhaıyr hannyń da bas súıegin qalpyna keltirgen»,- dedi  elshi.