Balettiń baby men baǵy

Elordaǵa alǵash ret gastroldik saparmen kelgen Borıs Eıfman atyndaǵy akademııalyq balet teatrynyń trýppasy «Astana Opera» teatrynyń Úlken zalynda A.S.Pýshkın romany jelisimen P.I.Chaıkovskıı men A.Sıtkoveskııdiń mýzykasyna jazylǵan («Avtograf» rok toby) «Evgenıı Onegın» baletin kórermenge usyndy. Munda basty partııalardy aty-jónderi álemge áıgili bı­shiler oryndady. Onegındi – Reseıdiń eńbek sińirgen ártisi, RF Prezıdenti syılyǵynyń ıegeri, «Altyn betperde», «Altyn So­fıt» syılyqtarynyń laýreaty Oleg Gabyshev somdasa, Tatıanany – halyqaralyq baıqaýlardyń jeńimpazy, «Altyn betperde», «Altyn Sofıt» syılyqtarynyń laýreaty Marııa Abashova, Len­skıı rólin – Reseı Prezıdenti syılyǵynyń, «Altyn Sofıt» syılyǵynyń laýreaty Dmıtrıı Fısher, al Olgany  Natalıa Povoroznıýk beıneledi. Sahna dekorasııasy ádet­tegideı Z.Margolın ónerimen erekshe sándendi, sonymen bir­ge kostıýmderdi daıyndaǵan P.Oký­­nev, O.Shaıshmelashvılı já­ne A.Iаkýshenko sheberligi spek­takldiń shynaıylyǵyn qam­tamasyz etti deýge tolyq negiz bar. Borıs Eıfmannyń esimi únemi qyzyq ta kórkem tájirıbelermen, ıaǵnı klassıkalyq shyǵarmalardy zamanaýı tyń úlgimen batyl ush­tastyrýymen málim desek, horeograf qazirgi zamanǵy balet­tiń mazmundyq sıpatyna da kóp ózgerister alyp kelýimen árip­testerinen oq boıy ozyq tur. – О́z spektaklderimde már­tebeli ádebıetke barynsha jú­gine otyryp, bizdiń aldy­myz­daǵy kemeńger tulǵalardyń sezimge toly tolǵanysyn jáne shyǵarmashylyq kúshin horeografııa óneri arqyly jetkizýge tyrysamyn. Sóz óneri – bul ál­deneniń basyn quraý men joqqa shyǵarý quraly bolyp tabylady, ol oıda júrgen kez kelgen isti qalpyna keltire otyryp jáne bir mezgilde sonyń kózin joıyp ta jibere alady. О́z oıyńdy aıqyn jetkizýdiń kóne tásili retinde dene, qımyl tili jalpyǵa túsinikti emosııalyq jáne rýhanı qundylyqtardan turady. Ádebı túpnusqany eskere otyryp, men ózime tek ho­reo­grafııanyń tilimen ǵana jet­kiziletin, zamandastarymdy alań­datatyn dúnıeniń maǵynasyn ashyp kórsetýdi maqsat tuttym, – dedi Reseıdiń halyq ártisi Borıs Eıfman. «Evgenıı Onegınniń» keıip­kerleri rýhanı quldyraǵan ǵasyr­lardan, aýmaly-tókpeli túrli zamannan ótken búgingi kúnniń mańyzdy keıipkerlerine aınalǵan. Petr Ilıch Chaıkovskııdiń shy­ǵarmasy men kompozıtor Alek­sandr Sıtkoveskııdiń rok mýzykasynyń sahnada ózara úılesim tabýy kórermenge horeo­graftyń oıyn tereń uǵynýyna múmkindik bergeni daýsyz. Sankt-Peterbýrg balet mektebi týraly «Taıms» gazetiniń jetekshi balet synshysy Debra Kreın: – Eıfmannyń horeografııasyna tán kórkemdik – biz odan ne kútemiz, ol sony beredi, ondaǵy birese bıshiler jappaı ekpin beretin kórinister keremet áserge bólese, al endi birde akrobatıka tilimen oryndalatyn maǵynaly monologtar kezdesedi, jalpy mundaǵy sezimniń árbir tamshysy qaıǵyǵa býlyqqan denelerdi sýretteıdi, – dep atap ótti. Borıs Eıfmannyń sankt­peterbýrgtik akademııalyq balet teatrynyń gastroli halyqaralyq III «Jibek joly» festıvali aıasynda ótti. Qarashash TOQSANBAI, «Egemen Qazaqstan» Sýretti túsirgen Erlan OMAROV, «Egemen Qazaqstan»