О́ńirler arasynda kásibı biliktilik pen tájirıbe almasý úshin Jambyl oblysynyń ákimi Kárim Kókirekbaev bastaǵan arnaıy delegasııa Qyzylorda oblysyna baryp qaıtty. Jyr alyby Jambyl jákemniń jurtynan barǵan delegasııa Syr elinde aýylsharýashylyq, ónerkásip, mádenıet salalaryna baılanysty birneshe memorandýmǵa qol qoıyp, ekijaqty barys-kelisti, alys-beristi nyǵaıtty.
Osy sapar barysynda áleýmettik mańyzdy taýarlar baǵasynyń negizsiz ósýine jol bermeý úshin Jambyl men Qyzylorda oblystaryndaǵy turaqtandyrý qorlary birlese jumys atqarmaqqa kelisti. Sóıtip, jambyldyqtar 100 myń tonna kúrish satyp alý týraly kelisimshartqa qol qoıdy.
– Bizde kúrish ónimderine degen suranys joǵary. Sondaı-aq, Taraz qalasynda turaqtandyrý qorynyń arnaıy dúkenderi jumys isteıdi. Onda áleýmettik mańyzdy azyq-túlik tómen baǵamen satylady. Biz satyp alǵan ónimderimizdi jármeńkelerde saýdalaımyz. Bul eki tarapqa da tıimdi bolady, – deıdi «Taraz áleýmettik kásipkerlik ulttyq korporasııasy» AQ dırektory Shamsat Isabekov.
Al Qyzylorda oblysynyń Áýlıeata óńirinen qant satyp alýǵa múmkindigi bar. О́ıtkeni, aımaqta 2 birdeı qant zaýyty jumys isteıdi. Kásiporyndardy shıkizatpen qamtamasyz etý úshin sharýalar bıyl kóktemde 6 myń gektar jerge qyzylsha ekken bolatyn. Osy qazan aıynan bastap óńirde qant qyzylshasyn jınaý naýqany bastalyp ta ketti.
Oralhan DÁÝIT,
«Egemen Qazaqstan»
Jambyl oblysy