«EXPO-2017» halyqaralyq kórmesin ótkizý kezeńinde 1,5 myńǵa jýyq áskerı qyzmetshi qoǵamdyq tártipti qamtamasyz etedi. Ortalyq kommýnıkasııalar alańynda ótken baspasóz máslıhatynda Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov osylaı dep málimdedi.
Aıta keteıik, brıfıng Ulttyq ulanynyń qoǵamdyq tártip kúzeti men memleket qaýipsizdigin qorǵaýdaǵy qyzmeti taqyryby aıasynda órbigen bolatyn.
Ulttyq ulannyń Jedel maqsattaǵy bólimderi Ishki ister organdarymen birlesip, elimizdiń 19 qalasynda qoǵamdyq tártipti kúzetýge kún saıyn 5000-nan asa áskerılerdi jumyldyrady. «EKSPO-2017 halyqaralyq kórmesiniń qarsańynda elordamyzda jedel maqsattaǵy jeke qurama jasaqtaldy. Olar qoǵamdyq tártip pen qaýipsizdik kúzetin qamtamasyz etetin bolady jáne kórme ótkizý kezeńinde qyzmetke túsetin áskerı qyzmetshiler sany 1,5 myńǵa jýyqtaıdy. Al 28-shi Dúnıejúzilik qysqy Ýnıversıadany ótkizý kezinde quqyqtyq tártipti qamtamasyz etýge joǵaryda atalǵan quramnan 1200 áskerı qyzmetshi qatystyrylmaq», – dedi general-maıor Muhametqalı Qusaıynuly.