Reseıdiń Krasnoıar qalasynda ótken «Sibirdiń bas júldesi» baıqaýynyń ekinshi júldesi qazaq jigitiniń qanjyǵasyna baılandy
«Astana Opera» memlekettik opera jáne balet teatry solısteri úshin álemdik deńgeıdegi bıikterdi baǵyndyrý qashanda qalypty dástúrge aınalǵan. Mysaly, halyqaralyq «Úlken opera» baıqaýynda birinshi oryndy ıelengen Saltanat Ahmetovanyń esimin kópshilikke tanystyryp jatý artyq. Al bıyl bul jobaǵa teatrdyń tanymal solısti Súndet Baıǵojın qatysýda. Álemdik óner sheberleri tarapynan joǵary baǵaǵa ıe ánshiniń ónerine búginde búkil otandastary súıispenshilik bildirip, oljamen oralaryna úmit artyp otyr. О́ner juldyzdary arasyndaǵy tartystyń tasasynda qalyp qoımaýǵa tıis taǵy bir qazaqstandyq solıst Serik Naqyspekovtiń balet baıqaýyndaǵy jeńisi otandastaryn kól-kósir qýanyshqa bóleýde.
Eske sala keteıik, «Astana Opera» memlekettik opera jáne balet teatrynyń solısti S. Naqyspekov 2011 jyly Almatydaǵy A. Seleznev atyndaǵy horeografııa ýchılıshesin támamdaǵannan keıin, 2011-2012 jyldary A. Vaganova atyndaǵy orys baleti akademııasyn oqyp bitirdi. Balet sheberi «Artek fýetesi» VII halyqaralyq klassıkalyq bı baıqaýynda ekinshi oryndy (Reseı, 2007), «О́rleý» halyqaralyq baıqaýynyń I jáne III dárejeli (Qazaqstan, 2010, 2008), sondaı-aq KIVS halyqaralyq baıqaýynyń júldelerin (Ońtústik Koreıa, 2011), Nıý-Iorktegi halyqaralyq balet ártisteri baıqaýynyń (AQSh, 2013), «Shabyt» halyqaralyq shyǵarmashyl jastar festıvaliniń (Qazaqstan, 2014), horeografııalyq oqý oryndarynyń VII Sibirlik halyqaralyq baıqaýynyń syılyqtaryn (Reseı, 2008) ıelengen.
Orystyń kórnekti kompozıtory S. Prokofevtiń týǵanyna 125 jyl tolýyna oraı uıymdastyrylǵan bul is-shara negizinen IV Halyqaralyq «HHI ǵasyr baleti» forýmy aıasynda ótti. Qazannyń sońynda aıaqtalǵan birinshi irikteý kezeńinen (syrttaı) múdirmeı ótken Qazaqstan, Almanııa, Italııa, Japonııa, Reseı, Qyrǵyzstan, Ýkraına jáne t.b. elderdiń bıshileri, qarashanyń 8-i men 12-si kúnderi aralyǵynda Krasnoıar opera jáne balet teatryna jınalǵan bolatyn. Oza shaýyp oryn alǵan jeńimpazdar esimi 12 qarasha kúni «HHI ǵasyr baleti» IV halyqaralyq forýmynyń jabylý saltanatynda málim etildi. Dál osy kúni jeńimpazdardyń qatysýymen saltanatty gala-konsert ótti.
Krasnoıar teatrynyń sahnasynda Serik Naqyspekov A. Adannyń «Korsar», H. Levensholdtiń «Sılfıda», S. Pýnıdiń «Esmeralda», B. Asafevtiń «Parıj jalyny», L. Mınkýstyń «Baıaderka» klassıkalyq baletterinen varıasııalar jáne ózi shyǵarǵan «Eske alý» horeografııalyq mınıatıýrasyn usyndy. Balet báıgesine solısti Reseıdiń eńbek sińirgen ártisi, pedagog-repetıtor Konstantın Zaklınskıı daıyndaǵan.
– Mundaı iri dodada baq synaý – óner ıesi úshin úlken mektep, ári ózara tájirıbe almasýǵa jáne óz kúshin synaýǵa taptyrmaıtyn múmkindik dep esepteımin. Alaıda, eń mańyzdysy – qazylar alqasy quramyndaǵy kásipqoı mamandar tarapynan beriletin shynaıy baǵa, – deıdi Serik Naqyspekov bizge bergen suhbatynda.
Belgili fransýzdyq horeograf, Parıj operasy baletiniń burynǵy dırektory Brıdjıt Lefevr tóraǵalyq etken qazylar alqasy músheligine álemdik balettiń qaıratkerleri endi, atap aıtar bolsaq, olardyń arasynda KSRO halyq ártisi, «Orys baleti» teatrynyń kórkemdik jetekshisi Vıacheslav Gordeev (Reseı), pedagog, Boston baletiniń kórkemdik jetekshisi Mıkko Nıssınen (AQSh), Qytaı halyq ártisi, QHR horeograftar odaǵynyń tóraıymy Chjao Rýhen (Qytaı), Sofııa opera jáne balet teatrynyń kórkemdik jetekshisi Sara-Nora Krısteva (Bolgarııa), horeograf, Bodrýmdaǵy Halyqaralyq balet festıvaliniń kórkemdik jetekshisi Saadet Zeınep Sýnal (Túrkııa), Reseıdiń halyq ártisi Valerıı Anısımov jáne taǵy basqalar bar. Qazaqstannyń eńbek sińirgen qaıratkeri, «Astana Opera» balet trýppasynyń dırektory Tursynbek Nurqalıev qazylar alqasy quramyna elimizdiń ókili retinde endi. Bolashaǵynan jarqyn úmit kútetin qazaqstandyq jas solıst buǵan deıin de halyqaralyq deńgeıdegi birtalaı festıval-baıqaýlarǵa qatysyp, aıtýly júldelerge qol jetkizgen bolatyn. Al bıyl ol Astana qalasynda ótken III Halyqaralyq balet ártisteri baıqaýynda birinshi orynǵa taban tiregen edi. Solıstiń málimdeýinshe, bul jeńister óner soqpaǵyndaǵy izdenisterdiń áli sońy emes, alda munan da mańyzdy ári aýqymdy jobalar kútip tur.
Qarashash TOQSANBAI,
«Egemen Qazaqstan»