QR Premer-Mınıstriniń orynbasary Imanǵalı Tasmaǵambetov Parıj qalasynda is-saparmen bolyp, IýNESKO-nyń Bas dırektory Irına Bokovamen kezdesti.
Sapar barysynda taraptar Qazaqstan men IýNESKO arasyndaǵy yntymaqtastyqtyń basym baǵyttaryna qatysty birqatar máselelerdi talqylady.
Kezdesý barysynda vıse-premer IýNESKO mandaty jáne jalpy BUU aıasyndaǵy elimizdiń bastamalaryna kórsetken turaqty qoldaýy úshin rızashylyǵyn bildirdi.
Atap aıtqanda, IýNESKO Bas konferensııasynyń 38-shi sessııasy barysynda QR Prezıdenti Nursultan Nazarbaev IýNESKO-nyń Shtab-páterinde boldy. Onda Memleket basshysy Almaty qalasynda IýNESKO-nyń basshylyǵymen 2-shi sanatty Halyqaralyq mádenıetterdi jaqyndastyrý ortalyǵyn qurý bastamasyn usynǵan edi.
I. Tasmaǵambetovtiń aıtýynsha, Prezıdent saparynan keıin osy bastamany júzege asyrý úshin taraptar aıtarlyqtaı jumystar júrgizdi. Bul ortalyq mádenıetter jaqyndasýynyń halyqaralyq onjyldyǵy aıasyndaǵy jobalardy iske asyrýǵa jáne jalpy áleýmettik ǵylymdardyń damýyna qoldaý kórsetedi.
«2016 jylǵy qazan aıynda IýNESKO-nyń Shtab-páterinde Almatynyń 1000 jyldyǵyn merekeleýge arnalǵan is-sharalardy ótkizýde barynsha qoldaý kórsetkenińiz úshin alǵys bildiremin. Qazaqstan úkimeti IýNESKO-men yntymaqtastyq deńgeıin joǵary baǵalaıdy jáne uıymnyń quzyryna kiretin barlyq salada birlesken jobalar men is-sharalardy júrgizýge qoldaý kórsetedi», - dedi I. Tasmaǵambetov.
Eske sala keteıik, bıyldan bastap Qazaqstan «Batys Tıan-Shan» transulttyq nomınasııasy boıynsha IýNESKO-nyń muralar tizimine endi. Bul turaqty damý jáne bıologııalyq áralýandylyqty saqtaý salasynda halyqaralyq yntymaqtastyqty belsendi júrgizýge qosymsha serpin berdi. Alaıda, osy baǵyttaǵy jetistikterge qaramastan, yntymaqtastyq aıasynda Talǵar qalashyǵy mańynda jol qurylysyn salýǵa baılanysty problemalyq suraqtar týyndady.
«Qazaqstannyń tarıhı nysandy IýNESKO-nyń búkilálemdik muralar tiziminde saqtaý jáne osy uıymnyń talaptaryna sáıkes jumys júrgizý maqsatynda osydan birneshe apta buryn el úkimeti «Talǵar» qalashyǵy aýmaǵynda barlyq qurylys jumystaryn toqtatýǵa tapsyrma berdi», - dep atap ótti I. Tasmaǵambetov.
Kezdesý aıasynda Jibek jolynyń alǵashqy Chanan-Tıanshan dálizindegi 8 qazaqstandyq eskertkishti IýNESKO-nyń búkilálemdik muralar tiziminde saqtaý jóninde kelisimge qol jetti. Sondaı-aq, Qazaqstan vıse-premerine atalǵan nysandy búkilálemdik muralar tizimine qosý týraly sertıfıkat tapsyryldy.