Quqyq qorǵaý organdaryna kadrlardy irikteý tártibi túbegeıli ózgerdi, dep habarlady Bas prokýratýra janyndaǵy Quqyq qorǵaý organdary akademııasy.
«Memleket basshysy «100 naqty qadam» ult josparynda kásiptik memlekettik apparat qurý mindetin qoıǵan bolatyn. Onyń negizi memlekettik qyzmetti túbegeıli jańartý bolýy tıis. Bul eń jaqsy daıarlanǵan jáne qabiletti mamandardy irikteýge múmkindik beredi», - delingen habarlamada.
Tapsyrmany iske asyrý aıasynda jyl basynan beri quqyq qorǵaý organdaryna kadrlardy irikteý tártibi túbegeıli ózgerdi. Qyzmetke alǵash ret túsetin úmitkerlerdi irikteýdiń úsh satyly júıesi engizildi. Bul týraly Bas prokýratýra janyndaǵy Quqyq qorǵaý organdary akademııasynyń baspasóz qyzmeti habarlady.
Birinshi kezeńde Memlekettik qyzmet isteri jáne sybaılas jemqorlyqqa qarsy is-qımyl agenttiginde nemese onyń aýmaqtyq bólimshelerinde memlekettik tildi jáne zańnamany bilýge testileýden ótý, sondaı-aq úmitkerdiń jeke qasıetterin zertteý kózdeledi.
Úmitker rásimderdi oń nátıjemen ótken jaǵdaıda tıisti sertıfıkat alyp, tikeleı quqyq qorǵaý organynda (prokýratýra, ishki ister organdary, sybaılas jemqorlyqqa qarsy qyzmet jáne ekonomıkalyq tekserý qyzmeti) irikteý men konkýrsqa qatysýǵa quqyly bolady.
Sońǵy kezeńde úmitkerler konkýrstyq komıssııamen áńgimelesýden ótedi.
Engizilgen jańalyqtar kadrlardy irikteý tıimdiligin arttyrýǵa arnalǵan, úmitkerlerdiń jeke tulǵasy týraly kóbirek bilýge múmkindik beredi.
Quqyq qorǵaý qyzmetine alǵash ret túsetin azamattardy testileý qaǵıdalary, baǵdarlamalary jáne uıymdastyrylýy Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi Tóraǵasynyń 2016 jylǵy 20 qyrkúıektegi buıryǵymen bekitilgen.