Orta salmaqta WBA (Regular) belbeýiniń ıegeri Dennıel Djeıkobs Gennadıı Golovkınge qarsy jekpe-jegine arnaǵan jospary jaıly bólisti. Bul týraly sports.kz habarlady.
«Golovkınge qarsy kezdesý mansabymdaǵy eń aýyr aıqastardyń biri bolaıyn dep tur. Buǵan deıin jeńilip kórmegen sportshymen jekpe-jekke shyǵatynyma qýanyshtymyn. Maǵan eshnárse ońaı kelgen emes. Jurttyń bári ońaı jaǵyn qarastyrǵanda men qıyndyqtardy jeńýge umtylatynmyn», – dedi amerıkalyq boksshy.
«GGG jyldam qozǵalmaǵanmen, oǵan dál soqqy jasaý qıyndaý. Onyń eń jaqsy tustary? Gennadıı myqty sportshy, ásirese djeb soqqylary dál tıer bolsa, eseńgiretip jiberýi múmkin. Al josparym boıynsha onyń dál osy tustaryna toıtarys berýim qajet. Bul úshin ne isteý kerektigin jaqsy bilemin», – dedi Djeıkobs.