Búgingi kúni Qadyr Myrza Áli Abaıdan keıingi eń kóp oqylatyn aqyn degen pikirler aıtylyp qalyp júr. Ony shyndyqtyń aýylynan alys deýge bolmaıdy. О́ıtkeni, aqynnyń ár adamnyń kókiregine birden jattalyp qalatyn óleń joldary men ulaǵatty sózderi jáne aıshyqty aforızmderi qazaqtyń keńbaıtaq dalasyn aralap ketkeli qashan. Osy oraıda qaıtalanbas sóz zergeri Ábish Kekilbaev bıik baǵany budan eki-úsh jyl buryn Oral qalasynda, Qadyr Myrza Áliniń eskertkishi ashylý rásimi kezinde bergenin de aıta ketýge bolady. Budan ári ol óz oıyn Qadyrdy áli árip tanymaǵan baldyrǵannan bastap, áripti kózildiriksiz kóre almaıtyn qarııalarǵa deıin biledi. О́zin bilmese de, sózin biledi. Mundaı daýsyz dańq, tataýsyz tanymaldyqtyń syry – Qadyr talantynyń qarapaıymdylyǵynda dep, jalǵastyryp áketkeni de umytyla qoıǵan joq. Qańtarda dúnıege kelip, qańtarda dúnıeden ótken Qadyr Myrza Áliniń esimi qashanda halyqtyń jadynda. Búgingi kúni aqyn jóninde «Máńgilik maıdan sarbazy» atty derekti-ǵumyrnamalyq fılmniń kórermenderge jol tartýy da osy pikirimizdiń bir dáleli. Ony Sháken Aımanov atyndaǵy «Qazaqfılm» kınostýdııasy túsirgen. Bul arada atalǵan kınostýdııanyń derekti fılmder jónindegi rejısseri Oral Júnisovtiń erekshe eńbegin atap ótken jón. Fılmniń uzaqtyǵy bir saǵat. Munda aqynnyń ómiri men shyǵarmashylyq qyzmetinen alynǵan dáıekti detaldar, úzik syrlar, shýaqty lebizder men estelikter eshkimdi de enjar qaldyra almaıdy. Ǵumyrnamalyq kınotýyndy aqynnyń ómir esigin ashyp, ushqan uıasynan bastaý alǵan. Derekti fılmde Ábish Kekilbaev, Aqushtap Baqtygereeva, Nurlan Orazalın, Esenǵalı Raýshanov jáne Temirhan Medetbek sekildi ádebıetimizdiń qabyrǵaly ókilderi Qadyr Myrza Áliniń kópshilik bile bermeıtin qyrlaryn qapysyz áńgimelep bergen. Aqynnyń janyn bir túsinse, aqynnyń jary ǵana túsine alatyn shyǵar. Osy oraıda Qadekeńniń qudaı qosqan qosaǵy Saltanat Zııanatkelini aıtqan ashyq syrlar da derekti fılmniń qundylyǵyn kóterip tur. Temir QUSAIYN, «Egemen Qazaqstan» ORAL