«Qazaqstan Damý banki» AQ (QDB) («Báıterek» ulttyq basqarýshy holdıngi» AQ enshiles uıymy) Shymkent qalasynda «A» sanatyndaǵy kólik-logıstıkalyq ortalyǵynyń qurylysyn («Continental Logistics Shymkent» JShS) qarjylandyrýdy bastady, dep habarlaıdy QazAqparat.
Quny 15 mlrd 796 mln teńge bolatyn joba shekara mańyndaǵy Ońtústik Qazaqstan oblysynyń taýar aǵynyn óńdeý boıynsha ınfraqurylymǵa degen artyp otyrǵan qajettilikterine baǵdarlanǵan. QDB tarapynan qarjylandyrý Memlekettik ındýstrııaldy-ınnovasııalyq damý baǵdarlamasynyń ekinshi besjyldyǵy aıasynda usynyldy. 15 jylǵa deıingi merzimge berilgen qaryz somasy 11,8 mlrd teńgeni quraıdy.
35 gektar jer ýchaskesinde salynatyn qurylystyń 24 783,6 sharshy metrine qoımalar (qurǵaq jáne klımattyq) salynady. Sondaı-aq kólik-logıstıkalyq ortalyqta ákimshilik korpýs, konteınerlik termınal, kedendik baqylaý aımaǵy (ýaqytsha saqtaý qoımasy men kedendik qoımalar) jáne ilespe ınfraqurylymdar ornalasatyn bolady. Túrli júkterdi saqtaý jáne qaıta óńdeý boıynsha OQO qajettiligi 1 mıllıon sharshy metrdi quraıdy. Bul rette, óńirdegi júk aınalymy qarqyndy óse túsýde: 2011 jyly bul kórsetkish 111,1 mln tonnany qurasa, 2012 jyly - 123,8 mln tonna, 2013 jyly - 132,9 mln tonna, 2014 jyly - 145 mln tonna, 2015 jyly 154,6 mln tonna boldy.