Taılandtyń ońtústik provınsııalarynda sý tasqynynan qurban bolǵandar sany 85-ke jetti, dep habarlady "Habar 24". Taǵy 4 turǵyn iz-túzsiz joǵalyp ketken.
Al tabıǵı apattan japa shekkender qatary 1 mıllıon 700 myń adamnan astam. Tótenshe jaǵdaı jónindegi ortalyqtyń basshysy Chanchaı Promlettiń aıtýynsha, keıbir provınsııalarda sý deńgeıi tómendegenimen, biraz óńirler áli sý astynda qalyp otyr. Al Narathıvat óńirinde tótenshe jaǵdaı jarııalandy. Degenmen, Phýket, Krabı aımaǵy men Samýı jáne Phangan araldaryna kóp zııan kele qoımaǵan. Bul jerlerde týrıstik nysandar qalypty jaǵdaıda jumys istep jatyr.
Aıta ketken jón, Taılandtyń ońtústigindegi sý tasqyny osy aıdyń alǵashqy kúnderinen bastalǵan tolassyz nóser saldarynan týyndaǵan.