Almatylyqtar aıtýly sport dúbiriniń jaqyndap kele jatqanyn anyq sezinýde. Dúısenbi kúni megapolıstegi «Dostyk Plaza» saýda oıyn-saýyq ortalyǵynyń alańynda stýdenttik jarystardyń volonterleri áserli fleshmob ótkizdi. Júzdegen jas latynnyń «U» árpi túrinde sapqa turyp, alda kele jatqan jarystardyń urandaryn mánerlep oqyp shyqty.
Jurttyń nazaryn aıtýly oqıǵaǵa burýdy kózdegen qyzyqty sharaǵa volonterlerdiń eń belsendi bóligi tartyldy. Olardyń basym bóligi Qazaqstannyń joǵary oqý oryndarynan, alaıda arasynda alys jáne taıaý shetelden kelgen azamattar da bar.
«Bizdiń volonterlar – birinshi kezekte Ýnıversıadanyń kóńil aýanyn jasaıtyn jigerli jastar. Endeshe, qyz-jigitterimizdiń qonaqtardy qarsy alýǵa daıyn ekenin kórsetkimiz keldi. Fleshmobtar kómegimen bizder úlken dodany atqaryp salýǵa kirisken memleketimizdiń mereıin asyra túskimiz keledi. Sondaı-aq, mundaı is-sharalar jastardy biriktirip, komandalyq rýhty kóteredi», – dedi «2017 jylǵy Almatydaǵy XXVIII Dúnıejúzilik qysqy Ýnıversıadaǵa daıyndalý jáne ótkizý jónindegi dıreksııa» MQ eriktilermen jumys júrgizý departamentiniń basshysy Abylaı Qondybaev.