Mánerlep syrǵanaýdan Qazaqstan ulttyq quramasynyń kóshbasshysy, Olımpıada chempıony Mıhaıl Shaıdorov 2026 jylǵy Olımpıada oıyndarynda erkin baǵdarlamada kıgen kostıýmin Olımpıada murajaıyna tabystady, dep habarlaıdy Egemen.kz.
Saltanatty rásim Italııanyń Mılan qalasyndaǵy Konkımen júgirý sporty úıinde ótti.
Is-sharaǵa Halyqaralyq konkımen júgirýshiler odaǵynyń prezıdenti Kım Chje Iol, Olımpıada murajaıy dırektorynyń orynbasary Iаsmın Maıhtrı, sondaı-aq, Qazaqstan Ulttyq Olımpıadalyq komıtetiniń prezıdenti Gennadıı Golovkın qatysty.
QR UOK basshysy Shaıdorovtyń jeńisi Qazaqstan mánerlep syrǵanaýynyń tarıhyndaǵy alǵashqy olımpıadalyq altyn medal ekenin atap ótti.
«Bul jaı ǵana jeńis emes - bul tarıh. Búgin sol tarıhtyń bir bóligi máńgi osynda qalady. Kostıýmniń Olımpıada murajaıyna tapsyrylýy mıllıondaǵan adamǵa chempıonymyzdyń murasyn kórýge múmkindik beredi.
Bul kostıým jas sportshylardyń armanǵa umtylyp, ózine senýine yqpal etip, jigerlendiredi. Mıhaıl, osy syılyǵyń úshin raqmet. Biz seni maqtan tutamyz», dedi Gennadıı Golovkın.
Mıhaıl Shaıdorov bul oqıǵanyń ózi úshin aıryqsha máni bar ekenin aıtty.
«Kostıýmimdi Olımpıada murajaıyna tapsyrý – men úshin zor mártebe ári úlken jaýapkershilik. Búgin osynda turyp, armanymnyń bir bóligi álemdik olımpıadalyq muraǵa aınalatynyna qýanyshtymyn. Bul kostıým – olımpıadalyq armanǵa bastaǵan jolymyzdyń nyshany. Endi onyń Qazaqstan atynan álemdik olımpıadalyq qozǵalys jádigerleriniń qatarynda ornalasýy men úshin erekshe mánge ıe.
Ol olımpıadalyq armannyń shekarasy joq ekenin, árbir sportshy úlken olımpıadalyq tarıhtyń bir bóligi bola alatynyn bildiretin nyshanǵa aınalsyn. Halyqaralyq Olımpıadalyq komıtetke qoldaý kórsetkeni úshin alǵys aıtamyn», dedi Shaıdorov.
Aıta keteıik, Mıhaıl Shaıdorov bul kostıýmmen Olımpıadaǵa deıin Gran-prı fınalynda da óner kórsetken. Alaıda tórtjyldyqtyń basty dodasyna deıin kıim qaıta tolyqtyrylyp, jetildirildi. Qazaqstandyq dızaınerlermen birge sportshy ǵarysh keńistigin beıneleıtin qanyq kók tústi tańdaǵan. Bul tús «Besinshi element» fılminiń tutas atmosferasyn aıqyn kórsetedi. Dızaıny juldyzdardy eske túsiretin shyny áshekeıler jáne tastarmen tolyqtyrylǵan.
Mıhaıl Shaıdorovtyń daıyndyǵyna bıýdjetten qansha qarjy jumsaldy?
Eske sala keteıik, Mıhaıl Shaıdorov Mılan-Kortına-2026 qysqy Olımpıadasynda mánerlep syrǵanaýdan altyn medal jeńip alyp, táýelsiz Qazaqstan tarıhynda qysqy sport túrlerinen shyqqan ekinshi Olımpıada chempıony atandy.