El úshin er isin tyndyryp júrgen jan

Eldik isterdi tyndyryp júrgen eńseli azamattar, qudaıǵa shúkir, qazaq topyraǵynda búgingi kúni de barshylyq. Solardyń arqasynda umytyla bastaǵan oqıǵalar men eren tulǵalardyń esimderi de qaıta jańǵyryp, urpaqqa tanylyp, eldigimizdiń irgetasyn nyǵaıta túsýde. Alaıda, jaqsy isti bastap, jalpaq dúnıege jalaýlatqanymen, ony aıaǵyna deıin jetkizbeıtinder de kóp. Solardyń ishinde qor quryp, jylý jınap, janashyr halyqtan aqsha túsirip, aqyry «altyn kórse, perishte joldan taıar» degendeı, ony qara basyna jumsap qoıyp, aýzyn qý shóppen súrtip shyǵa keletin pysyqtar da kezdesip qalady. Al bastaǵan isin aıaǵyna deıin jetkizip, eldiń alǵysyna bólenetinder týraly áńgime bólek. Abaıdyń «Edınısa —jaqsysy Ergen eli beıne nól. ...Edınısa ketkende, Ne bolady óńkeı nól?» jyr joldary osyndaıda oıǵa oralady. Sol «edınısalarǵa» jatatyndar qatarynda Shaharbek Ýsmanov aǵamyz da bar dep batyl túrde aıta alamyz. Aldymen qalyń kópshilikke Shahar­bek Ospanulynyń kim ekenin tanys­tyryp óteıik. Shákeńniń ákesi Ospan –  qazirgi Qyzylorda oblysynyń Jalaǵash aýdanynyń týmasy. Onyń ákesi Esjan da, ata-babasy da ál-qýatty, dáýletti adamdar bolǵan. Tekti urpaqqa quıylǵan mol nesibeniń qory úzilmeı, Keńes ókimeti kelgenshe dáýletti ǵumyr keshe­di. Sonyń arqasynda Ospan erte hat tanyp, aýyl mańynda erte atqa mingen belsendi adamnyń biri bolǵan. «El de, jer de halyqtiki bolady, biz halyq ókimetin quryp jatyrmyz», degen bolshevıktik sandalmaǵa senip, ol da jańa ókimetke janyn salyp qyzmet etedi. О́zi turǵan aýdanda «Jańa talap» artelin quryp, onyń alǵashqy uıymdastyrýshylarynyń biri bolady. Bul – baılardyń, qýatty sharýalardyń barlyq baılyǵyn, qazynasyn qyzyl ókimet tartyp alyp, kámpeskege ushy­ratqannan keıin halyqtyń isher as pen kıer kıimge jarymaı qalǵan kezi edi. Jańa artel eginshilikpen aınalysyp, eldiń aýzy aqqa tıip, bir toıynyp qalady. Bárin jup qylyp jaratqan jalǵyz Alla dúnıede jaqsylyq pen jaman­dyqty da egiz qylǵan ǵoı, endi toıynǵan halyqtyń arasynan «jaý izdeýshiler» tabylyp, Ospannyń jeti atadan beri dáýletti tuqymnan ekenin aıtyp, ony «baıdyń quıyrshyǵy, jaý» dep kórsetken jalańtós, sholaq belsendiler shyǵady. El dep, jer dep kúndiz-túni at­tan túspeı eńbek etken esil er bas saýǵa­lap, týǵan jerden qashýǵa májbúr bolady. Soltústikte ata-babasynan beri baı bolǵany úshin qýǵynǵa ushyrap, qorlyq kórgen Turǵyn aqynnyń mynadaı jyr joldary bolatyn: «Bytyrady jurt jerinen, Oınap-kúlgen teńinen. Qaıda barsań saý jan joq Qýylmaǵan elinen. Jazdym qaǵaz qamyǵyp, Shappaı-jel­meı talyǵyp. Urlyq-ótirik túk qylmaı Júrmiz bultty jamylyp...». Osyndaı kúıdi Ońtústiktegi Ospan aǵa­myz da keship, týyp-ósken jerinen ata-babasynan beri baı bolǵany úshin ǵana qýdalanyp, qyr asyp, sý keshedi. Bir kezde atyn atap, eske alýdyń ózi qylmys sanalǵan Temirbek Júrgenovtiń esimin qazaq halqy qazir jaqsy biledi. Onyń ultyna qyzmet etýde ozyq úlgiler men orasan ister tyndyryp, halyq aǵartý komıssary retinde qazaq óneriniń eýropalyq jolmen qaryshtaýyna asa zor eńbek sińirgen qaıratker ekeni ábden tanylǵan. Mine, osy Temkeń – Ospan aǵamyzben bir jerdiń týmasy. Tipti, týmasy ǵana emes, jaqyn inisi, ekeýi altynshy atalary Járimbette qosylady. Járimbet halqyna qaıyry tıgen, bar dúnıesin jetim-jesir ǵaripten aıamaǵan, qaıyrymy mol, áýlıe atanǵan kisi eken. Osyndaı tekti atadan taraǵan Ospan qýdalanyp, qamap qoıǵan jerinen kepildikpen shyǵarylǵan soń, áıeli men jeti aılyq Jánebergen degen ulyn alyp, ózbek jerine Temirbekti saǵalap barady. Ol kezde Temirbek Júrgenov О́zbekstannyń halyq aǵartý komıssary qyzmetin atqaryp júrgen shaǵy. Aıta ketetin bolsaq, ol Qazaq AKSROK-nyń I hatshysy L.Mırzoıannyń tikeleı shaqyrýymen 1933 jyldan bastap Qazaq AKSR-iniń osyndaı qyzmetine kelgen. Ospan Esjanuly osy inisiniń kómegimen ózbek jerindegi qazaǵy qalyń qonystanǵan Samarqan oblysynyń Zamın aýdanyna turaqtaıdy. Bir kezde Orynbordaǵy alty aılyq mal dárigerlik kýrsyn bitirgen ol mamandyǵy boıynsha jylqy ósiretin fermanyń zootehnıgi bolyp ornalasady. Jumystyń qandaı túrinen de bas tartpaǵan eńbekqor aǵamyz munda óziniń mańdaı terimen ońaı sińip, jylqy ósirý sharýashylyǵyn ońaı úıirip áketedi. Bir-eki jylda kúsh alyp, esin jıǵan aǵamyz 1931-1933 jyldardaǵy Qazaqstandaǵy ashtyqtan qashyp, bas saýǵalaǵan talaı aǵaıyndarǵa endi ózi pana bolady. Uzamaı 1937-1938 jyldardyń qandy súrgini bastalyp, eldegi barlyq esti-basty degen adamdardy tegis kógendep, qamaýǵa ala bastaǵan ǵoı. Sol jyldary Ospan Esjanov aǵamyzdyń sońyna da shyraq alyp túskender bolypty. Biraq ózbekter qazaqtardaı daraqylyq kórsetpeı, aralaryndaǵy jaqsynyń kózin qurtýǵa asyqpaǵan. Zamın aýda­nynyń sol kezdegi hatshysy Sattar Ýsmanov Qazaqstan NKVD-synan Esjanovty qýǵyndap kelgen qatynas qaǵazǵa: «Bizde Esjanov joq, Ishanov degen ozat kolhozshy, qazaq mamanymyz ǵana bar, ol kommýnızm isine ábden berilgen, adal adam», dep qol qoıyp, jaýap beripti. Sóıtip, keıbir satymsaq qazaq basshylary qusap, «ash qulaqtan tynysh qulaq» dep qol astyndaǵy adamdy ustap bermeı, basyn báıgege tigip, qorǵap qalǵan eken... 1937 jyldyń 1 aqpanynda Ospannyń otbasynda ińgálap taǵy bir perzent dúnıe esigin ashady. Ol osydan 80 jyl buryn О́zbekstanǵa qýǵynmen barǵan qazaq otbasynda dúnıege kelgen bizdiń búgingi áńgimemizdiń negizgi keıipkeri Shaharbek Ýsmanov aǵamyz edi. Otbasyndaǵy segiz balanyń biri bolǵan Shaharbek alaqanǵa salyp, áldılenip, erketotaı bolyp óspegen. Jasynan eńbekke umtylyp, áke-sheshesine kómektesip, mal tabýǵa daǵdylanǵan. Ata-ananyń ulaǵatty tárbıesi ony elge qaıyrymdy, meıirim-shapaǵaty mol azamat etip ósiredi. 1957 jyly orta mektepti bitirgennen keıin Shaharbek Tashkenttiń maqta-mata ınstıtýtyna oqýǵa túsedi. 1932 jyly ashylǵan bul joǵary oqý orny alǵashynda maqta óńdeý men ıirý, jibek tehnologııasy jáne toqý mamandyqtary boıynsha ınjenerler daıyndaıtyn. Keıingi jyldary birneshe mamandyq boıynsha jańa mamandar daıyndaıtyn bolǵan. 1967 jyldan Tashkenttiń toqyma jáne jeńil ónerkásibi ınstıtýty atalǵan. Shaharbek Ýsmanov osy ıns­tıtýtty ınjener-tehnolog mamandyǵy boıynsha 1962 jyly bitirip shyǵady. Bul – zaman stalındik qýǵyn-súr­ginnen tynyshtanyp, el kenelip, tól teńelgen jyldar edi ǵoı. Shaharbektiń ákesi Ospan aqsaqal da tarshylyqta qol úshin bergen ózbek aǵaıyndarǵa alǵysyn aıtyp, bir balamen barǵan basy endi segiz balasyn ertip, attyń basyn kúndiz esten, túnde tústen ketpeıtin týǵan jerge túzeıdi. Sóıtip, Shaharbek ınstıtýt bitirgennen keıin eńbek jolyn týǵan jerde bastaýǵa qol jetkizedi. О́zbek mánerimen tegi Ýsmanov dep jazylǵan aǵamyz aldymen «Slavıan» maqta zaýytyna aýysym sheberi bolyp taǵaıyndalady. Osynda tyńǵylyqty eńbegimen kózge túsken jas maman uzamaı óndiris bastyǵy bolyp ósiriledi. Al 1964 jyldyń naýryz aıynda ol Túrkis­tan maqta zaýytyna aýysyp, seh bastyǵy qyzmetine turady. Júrgen jerinde juǵymdy, halyqpen jumys isteı biletin, uıymdastyrý qabileti joǵary jas jigit uzamaı jergilikti ókimettiń nazaryn ózine aýdarady. Sóıtip, aýdan bıligi ony jastarmen jumys isteıtin salaǵa tartyp, 1965 jyly Túrkistan aýdandyq komsomol komıtetine jumysqa shaqyrady. Ol kezde jergilikti ókimettiń aıtqanynan, partııanyń aıdaýynan eshqaıda bultara almaısyń. Shaharbek te súıikti qyzme­tinen qol úzip, aýdandyq jastar oda­ǵynyń birinshi hatshysy qyzmetine barýǵa májbúr bolady. Bir ǵana jyl jastardyń ortasynda istese de Shaharbekke bul qyzmet halyqpen sóılesýdiń, óziniń oı-pikirin uqtyra alýdyń úlken mektebi sııaqty bolypty. Ol halyq aldyna shyǵyp, erkin sóıleýdiń, jınalysty qalaı júrgizýdiń mashyqtaryn boıyna ábden sińiredi. Jas jigittiń alymdy qa­damdary respýblıkalyq komsomoldy da qyzyqtyryp, 1966 jyly ony Almatydaǵy Ortalyq komıtetke qyzmetke aldyrady. Osynyń ózi-aq onyń kózge birden túsetin talantty jas ekenin aıǵaqtap tur. Alaıda, 1966 jyldyń aıaǵyna qaraı Shymkenttegi maqta zaýytyna dırektor bolatyn adam izdegende jergilikti basshylyq Shaharbek Ýsmanovtyń kandıdatýrasyna toqtaıdy. Sóıtip, ol komsomoldan qaıtadan óndiriske shaqyrylyp, 29 jasynan osy salanyń basshylyq qyzmetine kirisedi. Úsh jyldan keıin ózi buryn qyzmet etken Túrkistandaǵy maqta zaýytyn basqarýǵa aýystyrylady. Barlyǵy jıyrma jylǵa jýyq maqta óńdeý salasy kásipornynyń basynda júrgen jas jigit úlken ómir mektebinen ótedi. Túrkistanda dırektor bolǵan jyldarynda osy kásiporyndy odaq kólemindegi aldyńǵy qatarly maqta óńdeý zaýyttarynyń qataryna qosady. Osy kásiporyndar 1985 jyly «Kazzagothlopkoprom» óndiristik birlestigi bolyp birikkende onyń bas dırektory bolady. Elimiz Táýelsizdigin alǵannan keıin, 1994 jyly maqta kásiporyndary «Maqta» aksıonerlik qoǵamy bolyp qaıta qurylǵanda da Sh.Ýsmanov onyń birinshi basshylyǵynda qala berip, bul qyzmetti 1997 jyldyń jeltoqsan aıy­na deıin atqarǵan. Al 1997 jyldyń jeltoqsan aıynan bastap ol «Shymkent-Maqta» jekeshelendirilgen aksıonerlik qoǵamynyń prezıdenti bolǵan. Basqa sózben aıtqanda, Shaharbek Ýsmanov – maqta óńdeý kásiporyndaryn qyryq jylǵa jýyq basqarǵan elimizdegi eń ataqty maqtashylardyń biri. Memleket onyń salany órkendetý jolyndaǵy eren eńbegin joǵary baǵalap, «Qazaqstannyń eńbek sińirgen qaıratkeri» ataǵyn bergen, «Qurmet Belgisi» jáne Táýelsiz Qazaqstannyń «Qurmet» ordenderimen, birneshe medaldarmen marapattaǵan. Sonymen qatar, ol bir kezde Qazaqstan Respýblıkasy Joǵarǵy Keńesiniń Qur­met gramo­tasyn da alǵan. Túrkistan qalasynyń, Maqtaaral aýdanynyń, Qyzylorda oblysy Jalaǵash aýdanynyń Qurmetti azamaty jáne Ońtústik Qazaq­stan obly­sy­nyń Qurmetti azamaty. Shaharbek aǵamyz jubaıy Raıamen ekeýi tórt ul-qyz tárbıelep ósirip, olardan birneshe nemere-jıender kórip otyr. Balalarynyń bári de qazaqtyń úlgi tutarlyq jaqsy azamattar bolyp ósip, ómirdiń san túrli salasynda júr. Úlken uly Erik zańger, kishi uly Sultan men qyzdary Shara, Gúlmıra jeke kásipkerler. Shákeńniń nemereleri de ómirden ózderine laıyqty oryndar tapqan. Sonyń ishinde bir nemeresi Qýanysh Sultanovtyń nemeresine úılense, taǵy bir nemeresi Eńbek Eri Naǵym Qobylandınniń nemeresine turmysqa shyqqan. Mine, Sh.Ýsmanovtyń ómir joly osyndaı. Endi onyń halyq qazynasyn qalpyna keltirý jolyndaǵy qoǵamdyq eńbekterine toqtalaıyq. Qazaq «ózi bolǵan qyz tórkinin tanymas» deıdi. Bul qyzǵa qaratyp qana aıtylǵan sóz emes, óziniń toıǵany men qaltasynyń qampaıǵanyna ǵana máz bolyp, ata-baba, týǵan jer, ult pen ulysynyń tarıhy men taǵdyryna beıtarap qaraıtyn kózqamandardy da qamtyp aıtqan pálsapalyq uǵym. Shaharbek aǵamyz ondaıǵa kerisinshe, eldik iske eńserile kirisetin er kóńildi jan. Aldymen ol ákesi Ospannyń kindik qany tamǵan «Jańa talap» aýylyna eki júzdeı adam sııatyn záýlim meshit saldyryp beredi. Sóıtip, jerlesteriniń sheksiz alǵysyn alyp, Allanyń rızashylyǵyna bólenedi. Al endi Shákeńniń halqymyzdyń ardaqty uldarynyń biri Temirbek Júrgenovtiń esimin jańǵyrtýdaǵy isteri ulan-ǵaıyr. О́ziniń otbasyna Temkeńniń jasaǵan jaqsylyǵyn ákesiniń aýzynan tastamaı aıtýynan bilgen Shaharbek aǵa onyń eńbegin ábden aqtaǵan. Aldymen ol, 2012 jyly Baýyrjan Imanǵalıuly degen zertteýshiniń T.Júrgenov týraly kitabyn shyǵartyp, barlyq shyǵynyn jeke-dara kóterip alǵan. Temkeńniń ómiri men eńbekterin odan ári zerttegen Bekarystan Myrzabaevtyń da kitabyn jaryqqa shyǵarǵan. Temkeńniń О́zbekstanda uzaq jyldar qyzmet etke­nin aıttyq, sondyqtan ol týraly derekter kórshimizdiń muraǵattarynda kóp eken. Sol derekterdiń bárin zertteýshige О́zbekstannyń Ortalyq mu­r­aǵatynan Shákeń ózi alyp bergen. О́zbekter qazaqtardaı etek-jeńi keń, kelgen adamnyń bárine aqta­rylyp qalatyn ańqyldaq emes, mura­ǵatyna saq, ońaılyqpen kerek dúnıe­ni bere qoımaıdy. Tek Shákeńniń tabandylyǵynyń, olarmen til tabysa alatyn dıplomattyǵynyń arqasynda ǵana mol derekterge qol jetken. Osy kitaptarǵa baılanysty jáne basqa da qoǵamdyq sharalardyń uıym­dastyrylýyna uıytqy bolyp, bári­­niń de shyǵynyn ózi kótergen. Odan ári «temir narkom» týraly buryn tú­sirilgen derekti fılmdi de О́zbeks­tan muraǵattaryndaǵy derektermen tolyq­tyryp, jańa kıno shyǵarýǵa barlyq járdemin tıgizgen. Shaharbek Ýsmanovtyń Áıteke bıdiń basyna záýlim kesene ornatýdy bastap, onyń bel ortasynda júrgeni jáne ony aıaǵyna deıin jetkizgeni bir kitapqa júk bolarlyq orasan zor eńbek. Osy eńbeginiń ózimen ǵana ol qazaq halqynyń barlyq qurmetine laıyqty adam. Áıteke bıdiń О́zbekstannyń Naýaı oblysynyń Nurata qalasynda jerlengen deregin alǵash tapqan Shákeń. 2005 jyly О́zbekstanǵa barǵanda ol Nuratanyń qorymynda Seıitqul áýlıe men Áıteke bıdiń zıraty baryn estıdi. Jumysynyń tyǵyz ekendigine qaramaı Shákeń babalardyń basyna quran oqytýǵa barady. Kezinde qysh kirpishten qalanyp, odan uzaq jyldar boıy aıdaladaǵy ańyzaq soqqan aptap ystyqtyń astynda, jel men kúnnen ábden mújilip, tozǵan, qaraýsyz molany kórgende júregi qan jylaıdy. Onyń ózin de ózbek ókimeti Keńes jyldarynda syryp tastap, ústinen jol salmaq bolǵanda Naýaı oblysynyń qazirgi bas ımamy Nasreddın Ishannyń atasy, aýyl moldasy Saıd Eshonbobo bala-shaǵasymen traktor aldyna jatyp alyp: «Bul jerde qazaqtardyń áýlıeleri jatyr, qozǵaýǵa bolmaıdy, sońynan suraýy bolady», dep shyryldap, syrǵyzbaǵan eken. Osyny estip, qorymdy kórgen Shákeń qazaq degen halqy úshin, keler urpaqtyń qamyn oılap, basyn báıgege tigip, attan túspeı, jaý kelse, tolarsaqtan qan keship, el men jerdi qorǵaýdy uıymdastyryp, qý jandaryn shúberekke túıip, azap shekken uly babalardyń basy bulaı kútimsiz jatqanyna jalǵyz ózi kinálideı júregi qatty aýyrady... Sodan... sodan Shákeń babalardyń basyn kóterý jolynda attan túspeı, alasuryp qyzmet jasaǵan. Aldymen Qazaqstannyń sol kezdegi О́zbekstandaǵy elshisi Asqar Myrzahmetovke soǵyp, О́zbekstan bıliginen Seıitqul áýlıe men Áıteke bı beıitteriniń basyna kesene kóterýge ruqsat beretin jer alýǵa kómek berýin ótinedi. Aıta ketetin jaıt, Seıitqul áýlıe Áıteke bıdiń týǵan babasy. Qazaqstan men О́zbekstan arasyndaǵy birneshe shapqynnan keıin, áıteýir eki áýlıeniń beıitteri mańyndaǵy 6 gektar jerge qurylys júrgizýge ruq­sat alynady. Shákeń ózin qoldaıtyn birneshe adamnyń basyn qurap, endi keseneniń qurylysyn bastaýdy qolǵa alady. Bul is О́zbekstanǵa elshi bolyp qazaqtyń taǵy bir tulǵaly azamaty Zaýytbek Turysbekov kelgende jandanyp júre beredi. Júreginde ultyna degen jylylyǵy, jiliginde namysy bar, oı-órisi bıik azamat bul isti bastaý­shylardy bel sheship, belsene qoldap, qoldan kelgen kómekteriniń bárin jasaıdy. Sóıtip, beıittiń basyna bıiktigi 14 metr, uzyndyǵy – 15, eni 8 metr alyp kesene turǵyzylady, 17 metrlik muna­rasy bar meshiti bólek salynady. Tolyq keshenge murajaı, qonaqúı, shaıhana da engizilip, báriniń de qurylysy jaıy­men aıaqtalady. Murajaıdyń ishine qoıylatyn eksponattardy Shákeń Qazaq­stan men О́zbekstannan tirnektep jınaǵan. Áıteke bıdiń qoladan jasalǵan músini de onyń sánin keltirip tur. Sóıtip, ǵasyrlar boıy qaraýsyz qalǵan uly babamyzdyń basy qazir gúldeı jaınap tur (sýrette). Árıne, ol bir joly nemese bir aıda emes, birneshe jylǵa sozylyp aıaqtaldy. Osynsha ýaqytta jasy jetpisten asqan kisiniń Qazaqstan men О́zbekstanǵa, onyń ishinde Tashkentten 550 shaqyrym jerdegi jazda kúıip turatyn Naýaı oblysynyń bir túkpirindegi Nurataǵa qaıta-qaıta shapqylaýynyń arqasynda zorǵa aıaqtalǵan sharýa. О́ıtpese, bola ma, qajetti qurylys materıaldarymen qamtamasyz etý, qurylysshylarǵa bas-kóz bolý ońaı sharýa emes... Osynyń ózi úlken erlik emes pe? Árıne, Shákeńniń isine bir top azamattar qarjylyq, Arystan, Nurlan jáne t.b. inileri qol kómegin bergen. Sonymen birge, bul iske úles qosqandar arasynda Zaýytbek Turysbekov, Qarajan jáne Bernard Serdalıevter, Rahat Baızaqov, Altynsary Úmbetalıev, Ibatýlla Qalybekov, Esenǵalı Baımenov jáne t.b. bolǵanyn aıta ketý kerek. Biraq negizgi júk Shákeńniń óz moınynda bolǵan. Osynda qyzmet atqaratyn tórt adamǵa da Shákeń óz qaltasynan eńbekaqy tóleıdi... Áıteke bıdiń 370 jyldyǵy atalyp ótken Almatydaǵy 2014 jylǵy jıyn­da bul týraly talaı adam aıtty. Osyndaı jıyn Áıteke bıdiń basynda da ótkizilip, oǵan 1,5 myńdaı adam kelgen. Onyń da negizgi shyǵyndaryn Shákeń kótergen. Tipti Áıteke týraly fılm túsirýge de ol muryndyq boldy. Osynyń bárin Shákeń men istedim dep keýdesin qaǵýdan aýlaq. «Ortaǵasyrlyq sáýlettermen órnektelgen has sheberdiń qoltańbalary aıqyn ańǵarylyp, aı­shyqtyǵymen kópti qýantqan keseneniń tolyq bitýine, odan basqa da kóptegen ıgi sharalardyń júzege asýyna muryndyq bolǵan Shaharbek Ýsmanovtyń orasan eńbegi kimge bolsa da úlgi-ónege», dep jazypty keseneni kórgen belgili telejýrnalıst Doǵdyrhan Turlybek. «Men istedim degenshe myń istedi deseıshi» demekshi, Shaharbek Ýsmanov qazaqtyń at baılaıtyn qazyǵy, el tutas­tyǵynyń tutqasy bolǵan Áıteke bıdiń basyn men kóterip edim dep eshkimge aıtpaıdy. Bul da onyń márttigi, jan jomarttyǵynyń bir kórinisi. Onyń sońǵy istegen bir eren isi Tileý batyrǵa arnalǵan Shymkentte tur­ǵy­zylǵan eskertkish. Ataqty Móńke bıdiń ákesi Tileý ári bı, ári batyr bolǵan adam. Ol Saıramdy shabýǵa kelgen jońǵar­larmen aıqasýǵa balasy Jol­dyaıaqpen birge 17 myń qoldy bastap baryp tórt jyl soǵysqan. Sheshýshi urysta ekeýi de erlikpen qaza tapqan. Ekeýi­niń de súıegi keıin Qoja Ahmet Iаsaýı kesenesine jerlengen. Mine, osy batyrlarǵa arnalyp Shymkentte Qazaq han­dyǵynyń 550 jyldyǵyn atap ótken 2015 jyly turǵyzylǵan monýmentaldy eskertkishtiń kóterilýine de ol muryndyq boldy. Shákeńniń budan basqa da tolyp jatqan qaıyrymdylyq isteri bar, onyń bárin tizip shyǵý múmkin de emes, biz tek úlkenderine ǵana toqtaldyq. Osynyń ózi-aq onyń alyp tulǵaly, izgi nıetti jan ekenin kórsetip tur emes pe? Mine, búginderi 80-ge tolyp otyrǵan Shaharbek aǵamyz osyndaı adam. Qazir ol ulyn uıaǵa, qyzyn qııaǵa qondyryp, nemere-jıenderiniń qyzyq-qýanyshtaryn molynan keship, báıbishesimen ekeýi jaqyn-juraǵattarynyń ortasynda aman-saý, Shymkent qalasynda turyp jatyr. Halqynyń rýhanı baılyǵy úshin qyzmet etýge Shákeń áli de daıyn, Allanyń bergen qýatyn ol el ıgiligine jaratqysy kelip turatyn abzal jan. Jaqsybaı SAMRAT, «Egemen Qazaqstan» SýretTE: Sh.Ýsmanov