«Nur Otan» partııasynyń Ortalyq apparatynda partııa hatshysy Qanybek Jumashevtiń qatysýymen, aımaqtyq partııa kadrlyq rezervin qalyptastyrý jumysynyń qorytyndysy boıynsha brıfıng bolyp ótti.
Buǵan deıin 3,5 aı boıy, ıaǵnı 2016 jyldyń qyrkúıegi men jeltoqsan aıy aralyǵynda rezerv qalyptastyrý boıynsha birneshe kezeńnen turatyn jumystar júrgizilgen bolatyn. Atap aıtqanda, halyqqa keń aýqymda túsindirý, belgilengen talaptarǵa saı azamattardan qujattar jınaý, olardy bastaýysh partııa uıymdarynyń jınalystarynda usyný, test synaǵynan ótkizý jáne áńgimelesý jumystary júrgizildi. Barlyq is ashyq jaǵdaıda uıymdastyryldy. Úmitkerler 2, ıaǵnı aımaqtyq jáne aýdandyq rezervter boıynsha qabyldandy.
Aýdandyq rezervke úmitkerlerge kem degende bir jyl partııa múshesi, jumys ótili 2 jyldan kem emes, joǵary bilimdi jáne partııa salasynda qyzmet tájirıbesiniń bolýy sııaqty talaptar qoıyldy. Al buryn-sońdy qylmystyq jáne ákimshilik jazaǵa tartylmaý, jemqorlyqqa jol beretin is-áreketterge barmaý jáne partııalyq jazalaýynyń bolmaýy barlyq deńgeı úshin mindetti talap boldy.
Kadrlyq rezervke turǵysy kelgen 6658 adam qujattaryn tapsyrdy. Testileý synaǵynan keıin olardyń 62 paıyzy nemese 4148-i qaldy. Atalǵan synaq Konstıtýsııa, partııa Jarǵysy, partııa Doktrınasy, Saılaýaldy baǵdarlama, Jemqorlyqqa qarsy is-qımyl jónindegi partııa baǵdarlamasy boıynsha bilimin tekseretin 60 suraqtan turdy. Tıisti aımaqtyq komıssııalar ótkizgen áńgimelesý kezeńinen keıin 3052 úmitker iriktep alyndy. Bul – testileý synaǵynan ótkenderdiń 73, al qujat tapsyrǵandardyń 46 paıyzyn quraıdy. Irikteýdiń úshsatyly kezeńinen súrinbeı ótken úmitkerler partııa Saıası keńesi aımaqtyq bıýrosynyń qaýlysy boıynsha bekitildi.
– Búginde aımaqtyq partııa kadrlyq rezervi jasaqtaldy. Soǵan sáıkes ár aýdanda – 12, qalalarda – 15, oblys ortalyqtarynda 25 úmitkerden bar. Al elimiz boıynsha qatań irikteýden ótken 3052 úmitker bekitildi, – dedi Qanybek Jumashev.
– Ortalyq apparatta rezervke alynǵandardy qyzmetke usyný isi boıynsha udaıy monıtorıng júrgizilip turady. Atalǵan baza dınamıkalyq túrde bolady. Qazirgi tańda biz aımaqtyq partııa kadrlyq rezervin damytý boıynsha birqatar tapsyrmalardy aıqyndap aldyq.
Jaqyn arada rezervke ókildik jáne partııalyq organdarǵa usynýǵa daıyn,
qajetti talaptardyń meılinshe joǵary deńgeıine ıe, sondaı-aq, Qazaqstan Respýblıkasynyń Prezıdenti, partııa Lıderi Nursultan Nazarbaevtyń tapsyrmalaryn tıimdi júzege asyrýǵa múddeli mamandar alynady.
Láıla EDILQYZY,
«Egemen Qazaqstan»