Búgin Ońtústik Qazaqstan oblystyq máslıhatynyń kezekten tys onynshy sessııasy ótti. Halyq qalaýlylarynyń 2017 jyly ótken alǵashqy jıynynyń kún tártibinde 4 másele qaralyp, bir aýyzdan bekitildi. Jıynǵa oblys ákimi J.Túımebaev, oblystyq máslıhat hatshysy Q.Balabıev, oblystyq máslıhat depýtattary men BAQ ókilderi qatysty. Bul týraly OQO ákiminiń bspasóz qyzmeti habarlady.
Jıynda «2017-2019 jyldarǵa arnalǵan oblystyq bıýdjet týraly» sheshimine ózgerister men tolyqtyrýlar engizý jaıy qaralyp, nátıjesinde oblystyń 2017 jylǵy bıýdjeti 489,4 mlrd. teńge bolyp naqtylandy. Onyń 84,4 mlrd. teńgesi oblys qazynasyna respýblıkalyq bıýdjetten bólinetin nysanaly transfertter men kredıtter retinde berilip otyr.
Sessııada sóz alǵan oblys ákimi Elbasy Nursultan Nazarbaevtyń elimizdi damytý boıynsha bergen naqty tapsyrmalaryn oryndaý aıasynda osy jyldyń qazyna qarjysy birinshi kezekte óńir halqynyń áleýmettik máselelerin sheshýge baǵyttalatynyn jetkizdi.
Naqtyraq aıtqanda, bilim berý salasyndaǵy 33 nysannyń qurylysyn júrgizýge 19,4 mlrd. teńge, densaýlyq saqtaý salasyndaǵy birqatar asa qaýipti aýrý túrlerin emdeýge dári-dármekter alý úshin 39,6 mlrd. teńge bólinedi.
Budan bólek, J.Túımebaev áleýmettik qamsyzdandyrý salasyna 8,6 mlrd. teńge baǵyttalatynyn aıtyp, «О́rleý» jobasyna 5,1 mlrd. teńge bólinetinin aıtty.
Bıylǵy bıýdjet josparynda jylýmen qamtamasyz etý salasy men ınjenerlik-kommýnıkasııalyq júıelerdi retteý, sýmen qamtamasyz etý salasyn damytý, káriz júıeleri, joldardy qaıta qurý jumystary, aýyl sharýashylyǵy taýar óndirýshilerin memlekettik qoldaý jáne kásipkerlikti damytýǵa járdemdesý úshin kredıt berý jumystary da bar. Sondaı-aq, bıyl «Dıplommen aýylǵa» jobasy aıasynda 1,1 mlrd. teńge baǵyttalyp, 300 maman baspanaly bolady dep josparlanyp otyr.
Sonymen birge, sessııa otyrysynda óńirimizge eńbegi sińgen 25 azamatqa «Ońtústik Qazaqstan oblysynyń Qurmetti azamaty» ataǵyn berý týraly usynys jappaı qoldaý tapty. Sondaı-aq, memlekettik qyzmetke aýysýyna baılanysty jeke aryzyn bergen oblystyq máslıhattyń búginde eks-depýttaryna aınalǵan B.Jamalov, M.Egizbaev, M.Orazálıevterdiń depýtattyq ókilettiligi toqtatyldy.
Kezekten tys sessııa otyrysy barysynda óz salasynda úzdik atanǵan birqatar azamattar «QR Táýelsizdigine 25 jyl» merekelik medalimen marapattalyp, Ońtústik Qazaqstan oblysynyń Qurmet gramotasymen, Ońtústik Qazaqstan oblystyq máslıhatynyń Gramotasymen nagradtaldy.