О́tken jyly Qyzylorda oblysy boıynsha memlekettik kirister departamenitiniń ókilderi tarapynan júrgizilgen jumystardyń nátıjesinde memleket bıýdjetine 89 mlrd 630 mln teńge salyqtar men tólemderdiń túsimi qamtamasyz etilip, jospar 107 paıyzǵa oryndaldy. Bul týraly Qyzylorda oblysynyń óńirlik kommýnıkasııalar qyzmetinde ótken brıfıngte Qyzylorda oblysy boıynsha memlekettik kirister departamenitiniń basshysy Serik Mustafaev málimdedi, dep habarlady QazAqparat.
Onyń aıtýynsha, bul kórsetkish 2015 jylmen salystyrǵanda 13 mlrd teńgege nemese 17,3 paıyzǵa artyq. Onyń ishinde, respýblıkalyq bıýdjettiń oryndalýy 110,4% jáne jergilikti bıýdjettiń oryndalýy 103,4%. 2015 jylǵa qaraǵanda ósim kólemi respýblıkalyq bıýdjetke 25 paıyz (9 mlrd 748 mln), jergilikti bıýdjetke 8 paıyz (3 mlrd 449 mln) kóleminde.
Departament basshysynyń aıtýynsha, bıýdjettiń kiris bóligin qamtamasyz etýdegi basym baǵyt – basqa memlekettik jáne baqylaýshy organdarmen birlesken jumystardy uıymdastyrý, sonymen qatar jalǵan kásipkerlikke qarsy turý sharalaryn arttyrý.
«Kóleńkeli» ekonomıkanyń negizgi baǵyttarynyń biri – jalǵan kásipkerlikpen kúres. Osy baǵytta ótken jyly 39 qylmystyq is qozǵalyp, 41 istiń óndirisi aıaqtaldy. Sondaı-aq, 36-sy sotqa joldandy. Osy salada memleketke keltirilgen zalal mólsheri 3,6 mlrd teńgeni qurady, onyń 468,7 mln teńgesi óndirilip, 80,8 mln teńgeniń múlkine toqtam salyndy. Sonymen qatar, jalǵan kásipkerlerdiń kontragentterinen, sot sheshimimen, bıýdjetke 670 mln teńgeniń salyqtary men mindetti tólemderi óndirildi.
Salyq jáne keden salasyndaǵy quqyq buzýshylyqtar negizinde 68 qylmystyq is qozǵalyp, 57 istiń óndirisi aıaqtaldy, 17 is sotqa joldandy. 1,2 mlrd. teńgeniń zalaly qalpyna keltirildi. Esirtki kontrabandasyna qatysty 2 fakti anyqtalyp, ishki ister organdaryna berildi.