Qostanaı oblysynda «102» pýltine táýlik boıy myńnan asa qońyraý túsedi. Bul týraly oblystyq ishki ister departamenti jergilikti polısııa qyzmetiniń basshysy, polısııa polkovnıgi Nyǵmet Smaǵulov turǵyndarmen kezdesýde málimdedi.
Ol óńirde quqyq tártibin qamtamasyz etý úshin jergilikti polısııa qyzmeti turǵyndar men polısııanyń birlesip jumys isteýiniń jańa formalaryn tabýǵa kúsh salǵany jóninde aıtty. О́tken jyly óńirde qylmys 11,3 paıyzǵa nemese 2500-ge azaıdy.
Oblysta bir jylda 96 myń quqyq buzýshylyq tirkelgen, 5500-i eldi mekenderdi kógaldandyrý, kórkeıtý isine qatysty bolǵan. Bul iste quqyq buzǵandarǵa 7 mıllıon teńge aıyppul salynǵan, onyń 4 mıllıony tólengen. Sonymen qatar, jasóspirimder arasyndaǵy qylmys 24,5 paıyzǵa tómendegen.
Jurtshylyqpen kezdeskende jergilikti polısııa qyzmetinái basshysyna 200-ge jýyq suraq tústi. Onyń ishinde elý suraq alys aýdan turǵyndarynan elektrondyq poshta arqyly keldi. Onyń barlyǵyna jergilikti polısııa bastyǵy jaýap berdi.
Osy kezdesýde turǵyndarǵa jergilikti polısııa qyzmetiniń jumysta paıdalanatyn tehnıkalary men quraldary kórsetildi.
Názıra Járimbetova «Egemen Qazaqstan»