Memlekettiń ekonomıkadaǵy úlesin azaıtý kerek. Bul týraly Prezıdent Nursultan Nazarbaevtyń búgin jarııalanǵan Joldaýynda aıtylǵan.
«Memlekettiń ekonomıkadaǵy úlesin ishki jalpy ónimniń 15%-yna deıin, Ekonomıkalyq yntymaqtastyq jáne damý uıymy (EYDU) elderi deńgeıine deıin tómendetý ekonomıkalyq ósimge tyń serpin berýge tıis. Budan buryn 2020 jylǵa deıin jekeshelendiriletin 800-ge jýyq kásiporyndy qamtıtyn tizbe jasalǵan bolatyn. Tıisti jumystar atqarylýda. Úkimetke sol tizbedegi kásiporyndardy jekeshelendirýdi tezdetip, ony 2018 jyldyń sońyna deıin aıaqtaýdy tapsyramyn», - delingen Joldaýda.
Sonymen qatar Prezıdent iri kompanııalardy IRO-ǵa daıyndaý jáne oǵan beıimdeý isin de jedeldetý kerektigin, Yellow Pages qaǵıdattaryn engizý memleket úshin ekonomıkadaǵy qyzmet túrlerin 47 paıyzǵa (652-den 346-ǵa) qysqartýǵa múmkindik bergenin aıtqan.
"Kelesi kezeńde osy qaǵıdattarǵa saı kelmeıtin memleket menshigindegi barlyq kásiporyndar men uıymdardy 2020 jylǵa deıin jeke sektorǵa berý nemese joıý qajet. Al ondaı kásiporyndar sany birneshe myń bolady. Árbir baǵdarlama nemese tapsyrmaǵa oraı zańdy tulǵalar qurý tájirıbesi budan bylaı toqtatylýǵa tıis. Jekeshelendirýdiń jarııalylyǵy men tıimdiligin qamtamasyz etý qajet", - dep tapsyrdy N. Nazarbaev.