Kentaý polıtehnıkalyq kolledjiniń stýdentteri robot qurastyryp shyǵardy. Arnaıy baǵdarlamalar arqyly qozǵalatyn robot aldyndaǵy kedergilerden kidirmeı
óte alady. Lazerli jaryq arqyly jolynyń ashyqtyǵyn aıqyndap, burylatyn baǵytyn belgileıdi.
Qurylǵylary shet elden alynǵan. Degenmen, de, qurastyrý, baǵdarlama engizý jumystaryn oqý ornynyń jastary júrgizgen.
– Robotqa qandaı baǵdarlamany ornatsaq, sony oryndaıdy. Tipti, tóbesine kamera qoıyp, vıdeo túsirýge de múmkindik bar. Vıdeolardy jazyp alatyn arnaıy qurylǵy fleshkaǵa da oryn qarastyrylǵan. Áli de qozǵalý júıelerin, kórsetetin qyzmetin jetildire túsemiz. Bul jastardyń elektrotehnıka, fızıka, matematıka sabaqtaryna qyzyǵýshylyǵyn arttyrady, – deıdi kolledjdegi robototehnıka úıirmesiniń jetekshisi Sergeı Solovev.
Oqý ornyndaǵy taǵy bir tosyn jańalyq – únemdegish shamdardyń qurastyrylýy. Muny da stýdentter jasap shyǵarǵan. Qytaıdan arnaıy aldyrylǵan qosymsha qurylǵylardy paıdalanǵan jastar teorııa júzinde alǵan bilimderin tájirıbemen shyńdaýda.
– Buryn bizde eski shamdar turǵan. Shyǵyn kóp edi. О́zimizdiń jastar qurastyrǵan shamdar 5 ese únem beredi. Kolledjdiń ishi-syrtyndaǵy shamdardyń barlyǵyn da aýystyryp qoıdyq. Endi Kentaý transformator zaýytyndaǵy úlken projektorlardy osy júıege kóshirýge kelisim jasap jatyrmyz, – deıdi kolledj dırektory Talǵat Andabaı.
Qaırat ZAINIShEV
Ońtústik Qazaqstan oblysy