Rektorlar keńesiniń baıyptamasy

Quramyna elimizdiń tańdaýly ulttyq, memlekettik, aksıonerlik mártebedegi 41 ýnıversıteti enetin respýblıkalyq Rektorlar keńesiniń kezekti májilisinde Elbasynyń Úshinshi jańǵyrý týraly halyqqa Joldaýy aıasyndaǵy bilim jáne ǵylym máselesi talqylandy. Keńes jumysyn ashqan Bilim jáne ǵylym mınıstri Erlan Saǵadıev joǵary oqý oryndary aldynda turǵan maqsat-mindetterdi júıelep aıtyp ótti. Sala basshysy serpindi tehnologııalyq jań­ǵyrý úderisinde rektorlar men jetekshi ǵalymdar jaýapkershiligine de toqtaldy. Sondaı-aq, saıasattanýshy mamandar men ǵylymı ortalyqtardyń reformalar mánin túsindirýdegi rólin basshylardyń qaperine saldy. Atalǵan keńes tóraǵasy, L.N.Gýmı­lev atyndaǵy Eýrazııa ulttyq ýnıver­sıtetiniń rektory Erlan Sydyqov ar­naıy baıandamasynda: «Memleket basshysynyń jańa belesimizdi anyq­taıtyn Joldaýy qoǵamnyń bar salasyna, sonyń ishinde ásirese joǵary bilim salasyna zor qoz­ǵaý salyp otyr. О́ıtkeni, bir salaǵa da jaýapty azamattar – bilikti de bilimdi maman­dar. Keshe ǵana Ulttyq ǵylym aka­demııasynyń me­reıtoıyna baılanys­ty ótken saltanatty jıynda Elbasy ǵylym­ǵa tyń kúsh qosý men zerdesi joǵary ǵa­lym­­dar shoǵyryn qalyptastyrýdyń ma­ńy­zyna aıryqsha toqtaldy. Nursultan Nazarbaevtyń «Ǵalymdar dáýir sura­ny­syna saı óz dúnıetanymyn, ǵy­ly­mı qózqarasyn qaıta qaraýy kerek» degen tapsyrmasy Joldaýdaǵy negizigi tujyrymdamalardyń mánin aıqyndaı túsedi», dep atap kórsetti. Munan keıin sóılegen Bilim jáne ǵylym mınıstrligi Joǵary jáne JOO-dan keıingi bilim departamentiniń dırektory Darhan Ahmed-Zakı, Stra­tegııalyq josparlaý jáne úılestirý departamentiniń dırektory Nurgúl Shámshıeva, Ulttyq testileý ortaly­ǵynyń dırektory Ramazan Álimqulov jańa talap aıasyndaǵy óz salalarynyń jumys josparlarymen, ıgilikti bastamalarymen jáne keńesip sheshetin ortaq máselelermen tanystyrdy. Bul rette sala damýyndaǵy tyń óz­geris­terge yqpal etetin basqarý men aka­­de­­mııa­lyq erkindik jaıy, stra­tegııa­lyq jos­parlaý ereksheligi, ýnıversıtet ja­ǵ­daıyndaǵy irgeli ǵylym men qol­danbaly ǵylymdy damytý máni, oqýǵa qabyldaý men qajetti mamandar daıar­laýdyń tıimdi joldary jan-jaqty sóz boldy. Talqylaýǵa qatysqan rektorlar El­ba­synyń Joldaýyn, sondaı-aq ke­shegi Ulttyq ǵylym akademııasynyń 70 jyldyq saltanatynda sóılegen só­zin zor kásibı jaýapkershilikpen qabyl­daǵandaryn jáne aıqyndalǵan mańyzdy ǵylym-bilim mindetterin júzege asyrý boıynsha is-sharalar josparyn quryp, oryndaýǵa kirisip ketkenderin málimdedi. Láıla EDILQYZY, «Egemen Qazaqstan» ASTANA