Qazaq tilin qanshalyqty bilesiz?

Oral qalasynda 330 adam «Qaztest» synaǵynan ótti. Dál osy kúnderi Batys Qazaqstan oblysynyń Terekti, Bórili jáne Shyńǵyrlaý aýdandarynda taǵy 2000 adam memlekettik tildi meńgerý deńgeıin baǵalaý júıesine saı arnaıy test tapsyryp jatyr. – 2020 jyly Qazaqstan Respýblıkasy azamattarynyń 90%-y «Qaztest» tapsyryp, memlekettik tildi meńgergenin kórsetýi kerek, – deıdi Batys Qazaqstan oblystyq tilderdi damytý basqarmasynyń basshysy Mahambet Ihsanǵalı. Bul – májbúrli shara emes, ázirge erikti is. Memlekettik tildi meńgerý dárejesi 5 topqa bólingen. Testini alǵash tapsyrýshy áýeli dıagnostıkalyq synaqtan ótip, óziniń til meńgerý deńgeıin anyqtaıdy. Keıin testi qaıta tapsyryp, óz deńgeıine sáıkes sertıfıkat ala alady. Bola­shaqta «Qaztest» sertıfıkatynsyz qyzmetke alynbaıtyn laýa­zymdar tizimi Úkimette ázirlenip jatyr eken. – Synaqty Qazaqstan Respýblıkasy Bilim já­ne ǵylym mınıstrligi Testileý ortalyǵynyń mamandary alady. Biz uıymdastyrý máseleleri jaǵynan kómekshimiz. Jyl sońyna deıin oblysta 10 myń adam «Qaztest» synaǵynan ótýi jos­par­lanǵan, – deıdi Mahambet Ihsan­ǵalı. – «Qazaqstan-Oral» telearnasynyń 70 qyzmetkeri «Qaztest» synaǵyn tapsyrdyq. Synaq nátıjesi 1 aıdyń ishinde daıyn bolady eken. Suraqtar ózime qıyn bolǵan joq. Aýdıosaýaldar da bar. Eki jarym saǵat ishinde 150 suraqtyń durys jaýabyn belgilep shyqtyq, – deıdi redaktor Luqpan Eleý. Til synaǵyn tapsyrǵandardyń arasynda Batys Qazaqstan oblysy boıynsha «Halyqqa qyzmet kórsetý or­ta­lyǵy» departamentiniń de 70 mamany bar. Ortalyqtyń qujattamalyq jáne quqyqtyq qamtamasyz etý bóli­miniń qyzmetkeri Jansulý Musa­qulova ótken jyldyń sońynda 216 maman osyndaı test tapsyrǵanyn, aldaǵy maýsym aıynda olar dıagnostıkalyq synaqta kórsetken deń­geıin qaıta qorǵap, sertı­fıkat alatynyn jet­kizdi. Qazbek QUTTYMURATULY, «Egemen Qazaqstan» ORAL