Qazir áleýmettik jeliniń jas urpaq úshin álegi az bolmaı tur. Jurtty dúrbeleńge salǵan, «atyń óshkir» deıtin sumdyqtar aldan az shyǵyp jatqan joq. Sondyqtan onyń jolyn kesý jumystary qolǵa alynýda.
Jaqynda nemerem oqıtyn mektepte ata-analar jınalysyna qatysqanym bar. Onda urpaq taǵdyryna qatysty áńgime qozǵaldy. Quqyq qorǵaý salasynyń qyzmetkerleri kámeletke jasy tolmaǵan balalardyń arasyndaǵy qylmys jaıyna taldaý jasap, ıesiz ketken keıbir ınternetterdiń «keselin» terip aıtyp, odan saqtaný joldaryn usyndy. Úlgi emes, úreı týdyratyn oqıǵalardy da tizbeledi. Ásirese, barshylyqty kórsetetin oqýshy qolynda júrgen qymbat telefondardyń hıkaıalary da nazardan tys qalmady.
Keı tusta oqý básekesi men eńbek básekesiniń ornyn basyp bara jatqan qymbat kıim men ekiniń biri qol jetkize qoımaıtyn uıaly telefonnyń jaıy sóz bolyp, dástúrli oqýshy qalybyn saqtaýǵa ata-analar biraýyzdan kelisti. О́ıtkeni, ult urpaǵy buzylsa, ult keleshegi kúńgirt ekenin tilge tıek etip jatty.
Iá, zaman kóshinen qalmaý kerek. Biraq bul bilim alý tárbıe jaǵynan bolyp jatsa qoldaý qajet. Al kórseqyzarlyqqa kómilip, kózge túskennen kózaqy alamyz desek, utylarymyz haq desti jınalǵan kópshilik.
Jaqsy bilimdi, tálimdi tárbıeni oqýshy qymbat telefon ustamaı-aq ala alatynyn bul arada dáleldep jatý artyq dep bilemiz. Mektep emes, memlekettik qyzmetkerlerdiń ózi ondaı telefondaryn qyzmet bólmesine aparmaıtynyn dáıektegen azamattardyń sózi sanalyǵa sáýle túsirdi.
Sóz túıinine kelgende, ata-ana – oqýshy – muǵalim birligin bekitý, oqýshynyń mektepke kelgeninen, ketkeninen, úıge jetkeninen, qaıda júrgeninen habardar etetin qarapaıym telefon ustasa jetip jatyr degen baılamǵa kópshilik qoldaý kórsetti. Qajetti aqparatty qaraý úıde ata-analardyń kómegimen júzege asqany jón desti. Bul bastamany ózgeler de qoldar degen nıetterin barlyq ata-analar talqysyna usyndy.
Súleımen MÁMET,
«Egemen Qazaqstan»