15 jasyna deıin basqa balalar sekildi ósti, mektepte oqydy. Ras, minezi tuıyq edi. Ata-ájesiniń tárbıesinde bolǵan Baqyttyń qulaǵynda múkisi baryn áke-sheshesi de ańǵarmaǵan. «Mıynda isik bar» degen dáriger sózi anasy Mánshúkke aýyr úkimdeı estildi. Ota jasaldy. Aman qaldy. Biraq, «ekinshi top múgedegi» degen sóz taǵdyryna tańba bolyp basyldy. Soǵan qaramastan, keshki mektepti bitirdi. Odan keıin Halel Dosmuhamedov atyndaǵy Atyraý memlekettik ýnıversıtetinde beıneleý óneri mamandyǵyn meńgerdi. Qazir kásibı sýretshi. Kishkene kezinen bergi aq adal dosy bolǵan qylqalamyn bir sátke de qolynan tastaǵan emes. Túrli deńgeıdegi sýretshiler baıqaýlarynan júldesiz qaıtqan kúni az.
Aýyr naýqasqa shaldyqqannan keıin Baqyttyń boıy shamadan tys óse bergen. Qazir jasy 32-de, boıy 2 metr 10 sm. Ol Atyraýdaǵy eń boıy uzyn adam. 52-shi mólsherli aıaq kıim kıedi. Jergilikti saýda ortalyqtarynan oǵan shaq keletin kıim tabý múmkin emes, sondyqtan tek tapsyryspen aldyrady.
Baqyt Salıev tylsym tabıǵattyń únin kókiregimen túısinedi. Dúnıedegi sezingeniniń bárin qaǵazǵa túsirýge asyǵady. Salǵan sýretteri de san qıly, birde typ-tynysh tabıǵat múlgise, birde alasapyran teńiz tolqyny jaǵany uryp jatady, birde qyz ben jigittiń mahabbaty móldireıdi, birde erjúrek batyrdyń portreti rýh beredi. Ol úshin ómir degen – sýret. О́mir súrý degen – sýret salý. Memleketten alatyn járdemaqysynyń bárin derlik qaǵaz ben boıaýǵa jumsaıdy. Janynyń qalaýy sol ǵana, degenmen, ol da armandaıdy...
Baqytgúl BABASh,
«Egemen Qazaqstan»
ATYRAÝ