Qazaqstan delegasııasy BUU Qaýipsizdik Keńesiniń Sırııadaǵy gýmanıtarlyq ahýalǵa arnalǵan kezekti otyrysyna qatysty. Onda BUU Bas hatshysynyń orynbasary Stıven O’Braıenniń gýmanıtarlyq máselege baılanysty habarlamasy tyńdaldy.
Stıven O’Braıen óz sózinde sırııalyqtardyń kópshiliginiń, ásirese, áıelder, balalar men basqa da osal toptardyń múshkil hali, sondaı-aq eldegi dári-dármek tapshylyǵy týraly Qaýipsizdik Keńesin habardar etti.
Májiliske qatysýshylar Sırııa daǵdarysyn beıbit jolmen sheshýden ózge amal joq ekenin jetkizdi. Sondaı-aq, jıynda Qaýipsizdik Keńesiniń músheleri Sırııadaǵy soǵys qımyldaryn toqtatý isin ilgeriletýde belsendi ról atqarǵan Qazaqstannyń kúsh-jigerin atap kórsetti.
Qazaqstan delegasııasy BUU-nyń Sırııadaǵy gýmanıtarlyq máselelerdi úılestirý jónindegi basqarmasyna qarasty gýmanıtarlyq jáne medısına qyzmetkerleriniń qaýip-qaterge toly jaǵdaılardaǵy jumysyn joǵary baǵalady. Buǵan qosa, Qazaqstan ókilderi Sırııa máselesin sheshýdiń jalǵyz tásili retinde kelissózder jalǵastyrylý qajet ekenin sóz etti. Sonymen qatar, otyrysta Sırııadaǵy janjaldy beıbit retteý joldaryn izdestirý boıynsha Astana prosesi BUU qamqorlyǵyndaǵy Jeneva platformasyn sapaly túrde tolyqtyratyndyǵy aıtyldy.
Qazaqstan jaǵy janjaldasýshy taraptardy qarapaıym halyqty adam tózgisiz azaptaýdan, qalalardy qorshaýǵa alý taktıkasyn paıdalanýdan tolyǵymen ári tez bas tartýǵa shaqyrdy. Sondaı-aq, qazaqstandyq delegasııa álemdik qoǵamdastyqqa gýmanıtarlyq kómekpen az qamtylǵan Sırııa qalalaryna qajetti járdemdi qaýipsiz jáne kedergisiz jetkizý úshin BUU gýmanıtarlyq agenttikterimen yqpaldasý qajettigin eskertti.
Qazaqstandyq dıplomattar ILIM (Qazaqstanda tyıym salynǵan) tobynyń Ál-Rakka men El-Bab qalalaryndaǵy sý kózderi, áleýmettik ınfraqurylym, kópirler, joldar men aýrýhanalardy joıýyn aıyptady. Osy rette, adamdardyń azaptalýyna baılanysty lańkestik toptarǵa qarsy qatań sharalar qabyldaý qajettigine nazar aýdaryldy.
Daıyndaǵan
Joldybaı BAZAR,
«Egemen Qazaqstan»