Almatyda Ulttyq kitaphananyń N.Dáýlenov atyndaǵy zalynda Qazaqstannyń halyq ártisi Hadısha Bókeevanyń 100 jyldyǵyna arnalǵan eske alý keshi ótti. Rýhanı sharaǵa elimizdiń mádenıet jáne óner qaıratkerleri, teatr ártisteri, óner ıesiniń sahnalas izbasarlary men shákirtteri jáne Ulttyq kitaphananyń qyzmetkerleri qatysty.
Teatr sahnasynyń padıshasyna aınalǵan qazaq óneriniń Hadıshasyn shákirtteri men zamandastary tebirene eske aldy. Onyń rýhanı bıiktigi, ómir tarıhy, sahnadaǵy qaıtalanbas obrazdary, syrtqy beınesi men ishki dúnıesiniń sulýlyǵy, bıik mádenıeti, uztazdyq qaıratkerligi bári-bári kóz aldymyzdan ótkendeı boldy. Qazaq teatr óneriniń jaryq juldyzyna aınalǵan tarıhı tulǵanyń ómir ótkelderi, asqan asýlary men attaǵan belesteri, júrip ótken joldary ónerpazdyń kózin kórgen shákirtteri men izbasarlary tarapynan tereń mazmunda aıtyldy. Hadısha apamyzdyń tálimin kórgen T. Júrgenov atyndaǵy ulttyq óner akademııasynyń professory, teatr óneri fakýltetiniń dekany Aman Qulbaev:
«Hadısha apamyzben kóp jyldar qyzmettes boldyq. Teatr ónerindegi plastıkalyq ónerdiń qyr-syryna qanyqtyryp, árkez analyq, ustazdyq meıirimine bólep júretin. Ol kisilerdiń yqpalyn, ónerge degen tazalyǵyn, ómirge degen ińkárligin kórdik. Sulý ónerge degen qulshynysty ári qaraı qanattandyrýda jastardy tárbıeleýdegi qajyrly eńbegin aıamaǵan parasatty da ıbaly tulǵalardyń biri edi. Lenıngradtaǵy Cherkasov atyndaǵy ınstıtýtta tálim alǵan ol kisi talaı-talaı teatr jáne kıno óneriniń maıtalmandaryn tárbıelep shyǵardy. Keıin men de sol ınstıtýtqa aspırantýraǵa oqýǵa barǵanymda oqý teatrynyń úlken zalynda «bizdiń juldyzdar» dep atalǵan mańdaıshadan Hadısha Bókeevanyń da sýretin kórdim. V.Merkýrev, K.Lavrov sııaqty álemge áıgili sahnanyń sańlaq dúldúlderimen qatar turǵan Hadısha apamyzdyń beınesin kórgenimde maǵan qanat bitkendeı boldy. Maqtanysh sezimin uıalatqany sonshalyq, qazaq ekenime qýandym», dep aqtaryla eske aldy.
– Hadısha apamnyń bııazylyǵy, mirdiń oǵyndaı salmaqty sózderi, teatr sahnasyndaǵy sheberligi, meıirbandyǵy men adaldyǵy jadymyzda jańǵyryp tur. Ol kisimen talaı sahnalyq qoıylymdarda birge óner kórsettim. Ár somdaǵan keıipkeriniń tarıhyn tereń zerttep, júris-turysy men ishki jan dúnıesiniń bulqynysyna deıin oı eleginen ótkizip, sol adamnyń obrazyna enip ketetin. Artynan ergen izbasarlaryna baǵyt-baǵdar kórsetip, óner men sahnanyń qudirettiligin uǵyndyrýdan jalyqpaıtyn jan edi. О́mirlik serigi Baıǵalı Dosymjanov ekeýi de sońǵy demi qalǵansha qazaq ónerine qyzmet qyldy» – dep eske aldy Halyq ártisi Núketaı Myshbaeva.
Búgingi tańda qazaq teatr óneriniń tanymal tulǵalaryna aınalǵan bir top shákirtteri – Salıqa Qojaqova, Baıan Imasheva, Rahıla Ábdirahmanova, Bolat Ábdilmanovtar óner ıesiniń sahnadan tys ómirdegi adamı qalyby men izgi qasıetteri jaıly aıtyp ustazdaryn tebirene eske aldy. Kesh barysynda dástúrli ánshi Jasulan Musaǵalı qazaqtyń qara dombyrasymen áýeletip án shyrqap, jınalǵandardy bir jelpintip tastady.
Hadısha Bókeevanyń ónerdegi tynysyn ashyp ekinshi úıine aınalǵan Muhtar Áýezov atyndaǵy drama teatrdyń basshysy, Hadısha apamyzdyń kenje shákirtteriniń biri Erlan Bilál, bıylǵy teatr kóktemi festıvali qazaq óneriniń aıtýly tulǵasy Hadısha Bókeevaǵa arnalatynyn aıtty.
Teatr sahnasynda talaı-talaı súıekti rólderdi somdap, qasıetti ónerdiń kıesin ketirmegen, tunyǵyn laılamaǵan Hadısha Bókeevanyń dara joly men jarqyn beınesi halyq jadynda saqtalyp, tarıh paraǵynda qattala bermek.
Arman OKTIаBR,
jýrnalıst
ALMATY