Bıyl qar qalyń tústi. Al ony arshyp alý qıynǵa soǵyp tur. Ásirese, jasy egde tartqan adam úshin bul da bir jumys. Osyǵan oraı, Aqmola oblysynda «Jastar – Otanǵa» jobasy aıasynda qardan tazartý otrıadtary qurylyp, turǵyndarǵa aýlalaryn tazartýǵa qolushyn berýde.
Ásirese, «Jas Otan» JQ-nyń Aqkól aýmaqtyq bólimshesi belsendilik tanytyp, «Kómek qolyńdy ber» aksııasynyń bastalýyna muryndyq bolyp otyr. Mysaly, «Jas Otan» jastar qanatynyń bólimshesinen aýdan ortalyǵynyń turǵyndary Baqytjan Aýsalyqova, Evdokııa Trofımova jáne Lıýbov Elıseeva kelip, kómek suraǵan. Osyǵan oraı, «Jas Otannyń» belsendileri bolyp tabylatyn №4 Aqkól orta mektebiniń oqýshylary qart adamdarǵa aýlalaryn qardan arshyp berýge qolushyn berýge kiristi.
Eriktiler Uly Otan soǵysy ardagerleriniń aýlalaryn, balabaqshalardy, joldar men shatyrlardy da qardan tazartty. Olar úshin bul qyzyqty kóringenmen, qart adamdar úshin bul úlken kómek. Osylaısha, jastar úlkenderdiń rızashylyǵyna bólenip, ózderiniń qolqanat bolýǵa jarap qalǵandaryn sezinýde.
Asqar TURAPBAIULY,
«Egemen Qazaqstan»
Aqmola oblysy