Belgili sarapshy, HBO telearnasynyń qyzmetkeri Harold Lederman orta salmaqta WBA (Super), IBO, WBC jáne IBF tujyrymdary boıynsha álem chempıony Gennadıı Golovkın (36-0, 33 KO) men dál osy salmaqta WBA (Regular) belbeýiniń ıegeri Denıel Djeıkobs (32-1, 29 KO) arasyndaǵy jekpe-jek jaıly pikir bildirdi. Bul týraly sports.kz habarlady.
«Bul orta salmaqtaǵy eki myqty boksshynyń arasyndaǵy jekpe-jek bolmaq. Golovkın árıne óz salmaǵyndaǵy eń úzdik bylǵary qolǵap sheberi. WBO belbeýinen basqasynyń bárine qol jetkizgen. Soqqysy myǵym, qarsylasyna dál tıgizer bolsa, ońaı bolmasy anyq. Kásipqoı boksta da, 300-den astam kezdesý ótkizgen áýesqoı boksta da nokdaýn almaǵan. Kópshilik ony pound-for-pound reıtınginde birinshi nómirli boksshy dep esepteıdi», – dedi Harold Lederman.
«Djeıkobs ta myqtylardyń biri. Árıne, qaterli aýrýdy jeńip, sharshy alańǵa shyǵý da ońaı jumys emes. Boıyndaǵy erik-jigeri eriksiz tań qaldyrady. Qoldary uzyn, jyldam qozǵala biledi. Qoryta aıtqanda bizdi keremet jekpe-jek kútip tur», – dedi sarapshy.
Aıta keteıik, Golovkın men Djeıkobs arasyndaǵy aıqas 18 naýryz kúni AQSh-tyń Nıý-Iork qalasyndaǵy Madison Square Garden arenasynda ótedi. Boks keshin elimizde «Qazaqstan» ulttyq arnasy tikeleı efırde kórsetedi.